8,5 milljarða hagnaður Landsvirkjunar

Hörður Arnarson, forstjóri Landsvirkjunar.
Hörður Arnarson, forstjóri Landsvirkjunar. mbl.is/Hari

Hagnaður Landsvirkjunar fyrir óinnleysta fjármagnsliði og skatta á fyrri hluta ársins nam 96,4 milljónum Bandaríkjadala, eða sem nemur 12 milljörðum íslenskra króna. Hagnaðurinn á sama tímabili í fyrra var 86,7 milljónir dala og 75 milljónir á fyrri hluta ársins 2017. Heildarhagnaður félagsins á fyrri hluta ársins nam 68,6 milljónum dala, eða um 8,5 milljörðum króna, en var 54,5 milljónir dala á sama tíma í fyrra.

Rekstrartekjur félagsins voru 259,7 milljónir dala, eða um 32,2 milljarðar og lækkuðu um 9,8 milljónir dala frá sama tíma í fyrra. Rekstrar- og viðhaldskostnaður nam 61,5 milljónum dala, en var á sama tíma í fyrra 71,8 milljónir dala.

Skuldir félagsins halda áfram að lækka, en hafa lækkað um 126,1 milljón dala, eða sem samsvarar 15,6 milljörðum króna, frá áramótum. Voru skuldir félagsins í lok júní 1.758,5 milljónir dala, eða 218 milljarðar króna. Handbært fé Landsvirkjunar var í lok tímabilsins 159,9 milljónir dala og hækkar um 7,1% milli ára.

Krefjandi staða stærstu viðskiptavina

Haft er eftir Herði Arnarsyni, forstjóra Landsvirkjunar, í afkomutilkynningu að rekstur aflstöðva hafi gengið vel á árshlutanum. „Rekstur fyrirtækisins heldur áfram að þróast í rétta átt og efnahagur þess að styrkjast,“ er haft eftir honum. Þá er eiginfjárhlutfall félagsins nú komið yfir 50% í fyrsta skipti í sögu þess.

Helstu viðskiptavinir Landsvirkjunar eru stóriðjufyrirtækin hér á landi og eru álverin þar stærst. Segir Hörður í tilkynningunni að „vegna aðstæðna á alþjóðlegum hrávörumörkuðum er staða stærstu viðskiptavina krefjandi um þessar mundir“.

mbl.is
  ISK
  USD
  EUR
  GBP
  CAD
  DKK
  NOK
  SEK
  ISK
  USD
  EUR
  GBP
  CAD
  DKK
  NOK
  SEK