Velta innlendra greiðslukorta dróst saman um 1,1% að raunvirði milli ára í ágúst og er þetta mesti samdráttur síðan í júní 2013. Samdráttur mældist bæði í verslunum hér á landi og erlendis.
Þetta kemur fram í nýjustu Hagsjá hagfræðideildar Landsbankans.
Í ágúst mældist samdráttur upp á 0,3% milli ára í verslunum hér á landi miðað við fast verðlag og 4,4% erlendis miðað við fast gengi. Til samanburðar var vöxturinn 17% erlendis og 5% í verslunum hér á landi í ágúst í fyrra. Það er því útlit fyrir að breyting hafi orðið á neyslu Íslendinga í ljósi færri utanlandsferða, að því er bankinn greinir frá.
Þá segir, að ef horft sé til sumarsins í heild hafi kortavelta Íslendinga erlendis dregist saman um 3,3% milli ára. Til samanburðar hafi vöxturinn verið 18% yfir sumarmánuðina í fyrra og tæp 36% yfir sumarmánuði ársins 2017.
Hér á landi jókst kortavelta Íslendinga um 1,2% í verslunum yfir sumartímann, sem er þó mun minni vöxtur en á sumarmánuðum síðustu ára. Síðan í maí hefur mælst stöðugur samdráttur í kortaveltu Íslendinga erlendis sem helst í hendur við færri utanlandsferðir og ef til vill minni netverslun. Erfiðara er þó að skýra samdráttinn í veltu hér á landi yfir sumartímann.
Þá segir, að brottfarir Íslendinga um Leifsstöð hafi í ágústmánuði verið 14% færri en á sama tíma fyrir ári. Þetta er mesti samdráttur sem hefur sést á flugferðum Íslendinga í ágústmánuði síðan 2009. Yfir sumarmánuðina voru utanlandsferðir Íslendinga samtals 10% færri en í fyrra sem er mesti árlegi samdráttur yfir sumarmánuði síðan 2009.