Uppbyggingu síðari hluta Brynjureits í miðborginni er að ljúka. Með því koma 23 íbúðir á markaðinn. Jafnframt eru 49 íbúðir í fyrri hlutanum að koma á markað en þær voru fráteknar í sumar vegna áhuga fjárfesta.

Íbúðirnar í fyrri hlutanum voru auglýstar í lok maí en voru nokkrum dögum síðar teknar úr sölu. Verð íbúðanna í báðum áföngum er 29,9-79,9 milljónir króna en flestar íbúðanna kosta 30-40 milljónir. Þá eru nokkur verslunarrými til sölu sem henta þeim sem vilja búa nærri vinnustað.

Nítján bílastæði í kjallara fylgja íbúðum á efstu hæðum. Þó er mögulegt að kaupa bílastæði á 5 milljónir.

Pálmar Harðarson, framkvæmdastjóri verktakafyrirtækisins Þingvangs, sem byggir íbúðirnar, segir það hafa orðið ljóst í þessari viku að kaup fjárfestanna gengju ekki eftir.

Pálmar segir það einkenna síðari hluta Brynjureits, sem er á baklóð milli Laugavegar og Hverfisgötu, að engar tvær íbúðir séu eins.

Þá séu átta íbúðir á tveimur hæðum, fjórar í hvoru bakhúsi, og með a.m.k. einum hellulögðum þakgarði.

Einstakt kauptækifæri

„Þetta er einstakt tækifæri fyrir þá sem vilja búa í miðbænum enda hafa svona íbúðir ekki verið byggðar. Þessar íbúðir bjóða upp á borgarupplifun sem hefur ekki verið í boði. Fólk verður að koma og skoða íbúðirnar til að upplifa þetta,“ segir Pálmar sem efast um að fleiri svona fjölbýlishús verði byggð í miðborginni í náinni framtíð. Opið hús verður á reitnum um helgina.

Pálmar sýndi Morgunblaðinu reitinn fyrr í vikunni en þá notuðu málarar tækifærið í sólinni og lögðu lokahönd á útveggi. Krafan um uppbrot birtist í fjölbreyttu útliti en húsin líta út fyrir að vera byggð á mismunandi tíma.

Bakhúsin skiptast í vestur- og austurbyggingu. Milli þeirra er ný göngugata í miðborginni sem tengir Laugaveg og Hverfisgötu saman. Var henni gefið nafnið Kasthúsastígur.

Að sögn Pálmars er gert ráð fyrir þjónustu á jarðhæð í austurbyggingunni. Rýmin séu með aðgang að stigahúsinu enda sé ætlunin að eigendur starfseminnar geti búið í húsinu. Ein íbúðin sé inn af verslunarrýminu. Rýmin geti t.d. hentað gullsmiðum, listafólki og öðrum með eigin starfsemi. Slíkt fyrirkomulag sé til dæmis vel þekkt frá evrópskum borgum.

Nánari umfjöllun er að finna í Morgunblaðinu sem kom út 19. september.