„Erfiður dagur alls staðar í bankanum“

Benedikt Gíslason, bankastjóri Arion banka, segir eina af helstu áskorunum ...
Benedikt Gíslason, bankastjóri Arion banka, segir eina af helstu áskorunum bankans að aðlaga starfsemina að breyttum veruleika fjármálafyrirtækja almennt, meðal annars í ljósi sjálfvirknivæðingar. Ljósmynd/Aðsend

„Eins og gefur að skilja hefur þetta verið erfiður dagur alls staðar í bankanum en ekki síst í höfuðstöðvunum þar sem margir starfsmenn voru að kveðja okkur í dag,“ segir Benedikt Gíslason, bankastjóri Arion banka, í samtali við mbl.is. 

Hundrað starfsmönnum bankans var sagt upp í dag. Fjórir af hverjum fimm sem sagt var upp í dag störfuðu í höfuðstöðvum bank­ans en einn af hverjum fimm í úti­bú­um. 93% starfsmannanna störfuðu á höfuðborgarsvæðinu. 

Um er að ræða mestu fjölda­upp­sagn­ir sem Ari­on banki hef­ur ráðist í frá því að bank­inn var stofnaður á grunni gamla Kaupþings eft­ir hrun ís­lenska fjár­mála­kerf­is­ins haustið 2008.

Uppsagnirnar tengjast nýju skipulagi bankans sem tók gildi í dag og var samþykkt á fundi stjórnar Ari­on banka í morgun. „Samhliða því erum við að fara yfir okkar skipulag og mönnun. Undirbúningurinn hefur staðið yfir í þónokkurn tíma,“ segir Benedikt og vísar í orð sín á kynningarfundi árshlutauppgjörs fyrir annan ársfjórðung í ágúst þar sem hann greindi frá því að stefnumótunarvinna stæði yfir. 

„Við erum búin að vera að rýna í okkar rekstur ofan í kjölinn. Við erum að teikna upp nýjar áherslur og nýtt skipurit og mannabreytingar eru teknar í samræmi við það,“ bætir Benedikt við, en hann tók við stöðu bankastjóra af Hösk­uld­i H. Ólafs­syni í júlí. 

Hundrað manns var sagt upp hjá Arion banka í dag. ...
Hundrað manns var sagt upp hjá Arion banka í dag. Um er að ræða mestu fjölda­upp­sagn­ir sem bankinn hef­ur ráðist í frá því að hann var stofnaður á grunni gamla Kaupþings eft­ir hrun ís­lenska fjár­mála­kerf­is­ins haustið 2008. mbl.is/Kristinn Magnússon

Segir bankann hafa fylgt lögum í hvívetna

Friðbert Traustason, framkvæmdastjóri starfsmanna fjármálafyrirtækja, gagnrýnir að bankinn hafi ekki talið sig geta upplýst um uppsagnirnar því bankinn sé skráður á markað og telur hann að lög um hópsuppsagnir hafi verið brotin með uppsögnunum í dag. Benedikt segir að bankinn hafi fylgt lögum og reglum í hvívetna. 

„Við þurfum líka að fylgja lögum sem lúta að verðbréfamarkaðnum og uppfylla þau skilyrði og skyldur sem fylgja því að vera skráð hlutafélag í tveimur kauphöllum. Við vorum að tryggja að þetta væri allt í samræmi við lög og gert eins vel og hægt er. Það eru aðilar innan bankans sem vissu af þessum aðgerðum og fóru þeir á innherjalista. Við verðum að horfa til þessa þegar við erum að miðla mögulega verðmótandi upplýsingum sem eru ekki komnar í framkvæmd,“ segir Benedikt og bendir á að endanleg ákvörðun um fjölda og eðli uppsagnanna og skipulagsbreytinga hafi verið tekin í morgun.  

Aðlaga starfsemi bankans að breyttum veruleika

Ekki verða gerðar nein­ar grund­vall­ar­breyt­ing­ar á starf­semi í úti­bú­um Ari­on banka í kjöl­far breytinganna og engu þeirra verður lokað en mögu­lega verða ein­hverja mönn­un­ar­breyt­ing­ar. Benedikt bendir á í því samhengi að ein af helstu áskorunum bankans sé að aðlaga starfsemina breyttum veruleika fjármálafyrirtækja almennt, meðal annars í ljósi sjálfvirknivæðingar. 

„Ég hef bent á að það eru fjörtíu sinnum fleiri viðskiptavinir sem heimsækja netbankann og appið á hverjum degi en heimsækja útibúin okkar. Þessir viðskiptavinir kjósa að nýta þjónustu okkar þar frekar en í útibúunum. Við horfum til þessa og erum alltaf að aðlaga þjónustu okkar í útibúanetinu breyttum þörfum. Það getur því verið að mönnun og afgreiðslutími muni koma til með að breytast.“   

Aðspurður hvort von sé á frekari uppsögnum á næstunni svarar Benedikt neitandi. „Það segir sig sjálft að við erum ekki að fara í aðra svona aðgerð.“

mbl.is
  ISK
  USD
  EUR
  GBP
  CAD
  DKK
  NOK
  SEK
  ISK
  USD
  EUR
  GBP
  CAD
  DKK
  NOK
  SEK