Danski sendiherrann fékk fyrsta bjórkassann

Ölgerðin Egill Skallagrímsson hefur afhent danska sendiherranum á Íslandi fyrsta kassann af Tuborg-jólabjórnum, rétt áður en hann kemur á markað.

„Þessi hefð, sem ráðið hefur ríkjum undanfarin ár, kemur til vegna J-dagsins svokallaða, en þá kemur Tuborg-jólabjórinn opinberlega á bari, hótel og veitingastaði. 

Eva Egesborg Hansen, sendiherra Dana, tók fagnandi við fyrsta kassanum af Tuborg Julebryg, enda sterk hefð fyrir jólabjórum í Danmörku, rétt eins og skapast hefur hér á landi,“ að því er fram kemur í tilkynningu frá Ölgerðinni. 

Fram kemur, að J-dagurinn sé alltaf haldinn hátíðlegur fyrsta föstudag í nóvember og það klukkan 20:59.  

„Ástæða tímasetningarinnar er sú að þegar jólabjórinn kom fyrst á markað í Danmörku árið 1981 seinkaði framleiðslunni með þeim afleiðingum að fyrsti bjórinn komst ekki á krana fyrr en klukkan 20:59. Á sama augnabliki féll fyrsti jólasnjórinn,“ segir enn fremur.

• Blogga um frétt