Evrópski flugvélaframleiðandinn Airbus hefur samþykkt að greiða frönskum, breskum og bandarískum yfirvöldum 3,6 milljarða evra, eða sem nemur hátt í 500 milljörðum króna, í dómsátt vegna ásakana um fjársvik, spillingu og mútur.
Rannsókn hófst fyrir fjórum árum og snúa málin að því að sala á flugvélum fyrirtækisins hafi farið fram í gegnum milliliði og átti að fara fyrir dóm í löndunum þremur í lok þessa mánaðar.
Frá því rannsóknin hófst hefur Airbus hætt að styðjast við milliliði við sölu flugvéla. Auk þess lét forstjóri Airbus, Tom Enders, af störfum í fyrra og ný stjórn er tekin við með breyttum áherslum. Enders sætti mikilli gagnrýni sem sneri að því hvernig hann tók á ásökunum um spillingu og mútur hjá Airbus.