Tekjur Eimskips drógust saman um meira en milljarð

Tekjur Eimskips námu 679,6 milljónum evra í fyrra og lækkuðu um 9,6 milljónir evra, jafnvirði um 1,3 milljarða króna, á milli ára. Sömuleiðis var hagnaður fyrirtækisins minni, eða ein milljón evra, en í afkomutilkynningu sem send var út fyrr í kvöld kemur fram að það skýrist af einskiptis skattalegum áhrifum og virðisrýrnun vegna sölu skipa.

„Án þessara liða væri hagnaður 7,0 milljónir evra sem er sambærilegt við hagnaðinn fyrir árið 2018,“ segir í tilkynningu Eimskips. EBITDA fyrirtækisins nam 60,5 milljónum evra á árinu.

Eigið fé félagsins nam 230,9 milljónum evra um áramót, jafnvirði rúmlega 32 milljarða króna og var eiginfjárhlutfallið 44%. Ekki stendur til að greiða hluthöfum félagsins út arð á þessu ári.

Vilhelm Þorsteinsson, forstjóri Eimskips. mbl.is/Kristinn Magnússon

Ávarp Vilhelms Þorsteinssonar, forstjóra Eimskips, sem fylgdi tilkynningu félagsins, má lesa hér að neðan:

„Árið 2019 einkenndist af minni innflutningi til Íslands sem minnkaði um 10,7%, sem er í takt við minnkun í tölum Hagstofunnar um heildarinnflutningsmagn til Íslands. Að auki hafði loðnubrestur og minni veiðar við Ísland á síðasta ársfjórðungi 2019 töluverð áhrif á útflutningsmagn frá Íslandi. Ég er ánægður að sjá að áhersla okkar á hin ýmsu hagræðingar- og samþættingarverkefni hefur jákvæð áhrif á niðurstöður ársins og mun halda áfram að skila jákvæðum áhrifum á árinu 2020. Þetta er í samræmi við vegferð félagsins um aukna samþættingu og áherslu á kjarnastarfsemi.

Starfsemin okkar í Noregi hélt áfram að bæta afkomu sína og Trans-Atlantic-þjónustan okkar óx um tveggja stafa tölur á árinu. Afkoman af flutningsmiðlun jókst milli ára þrátt fyrir minna flutningsmagn.

Launakostnaður lækkaði um 5,9 milljónir evra á árinu sem skýrist að mestu af fækkun stöðugilda í tengslum við samþættingu í rekstrinum.

Þótt hagnaður ársins sé lágur eða 1 milljón evra, þar sem helstu ástæður eru einskiptisliðir vegna virðisrýrnunar við sölu fimm skipa og skattakostnaðar á fyrsta ársfjórðungi, þá erum við mjög ánægð með verulega aukningu í sjóðstreymi frá rekstri á milli ára.

Við kynntum nýtt gámasiglingakerfi í október og tókst með þeim breytingum að fækka gámaskipum félagsins um eitt. Með nýja kerfinu aukum við þjónustu og áreiðanleika siglingakerfisins ásamt því að lækka fastan rekstrarkostnað.

Eimskip steig einnig mikilvæg skref í endurnýjun gámaskipaflotans og í aðlögun frystiskipaflotans að núverandi rekstri þegar félagið seldi fimm skip í lok árs.

Eimskip gefur í dag út samfélagsábyrgðarskýrslu (ESG) fyrir árið 2019, nú í fyrsta sinn samhliða útgáfu ársreiknings félagsins. Kolefnisfótspor Eimskips, mælt í kolefnisútblæstri pr.tonn af flutningsmagni, hefur minnkað um 14,2% síðan árið 2015 sem er yfir okkar markmiðum og ég er viss um að við bjóðum umhverfisvænstu lausnina í vöruflutningum til og frá Íslandi. Við búumst nú við því að nýju skipin okkar, sem eru sérstaklega útbúin til að draga úr umhverfisáhrifum, verði afhent á öðrum og þriðja ársfjórðungi. Við hlökkum til að hefja samstarfið við Royal Arctic Line og gerum ráð fyrir að hefja það samstarf þegar fyrra skipið hefur verið afhent á öðrum ársfjórðungi.

Í ágúst síðastliðnum upplýstum við um að félagið myndi skoða sölu á dótturfélagi sínu Sæferðum. Í kjölfarið var farið í söluferli en þrátt fyrir nokkurn áhuga kaupenda á félaginu þá leiddu nokkuð ítarlegar viðræður ekki til sölu. Við höfum nú ákveðið að hætta við söluferlið og munum því áfram reka Sæferðir í óbreyttri mynd.

Afkomuspá Eimskips fyrir árið 2020 er á bilinu 51-58 milljónir evra án áhrifa IFRS 16. Óvissa varðandi þróun íslenska hagkerfisins, stöðu á alþjóðamörkuðum og þróun á COVID-19-veirunni skýrir þetta breiða bil.

Að lokum vil ég þakka okkar góða starfsfólki fyrir vinnuframlag þeirra og áhuga á síðasta ári og viðskiptavinum og samstarfsaðilum fyrir okkar verðmæta samstarf.”

• Blogga um frétt