Boeing þarfnast fjárhagsaðstoðar

Bandaríski flugvélaframleiðandinn Boeing hefur farið þess á leit við bandaríska ríkið og einkafjárfesta að veitt verði 60 milljarða bandaríkjadala fjárhagsaðstoð til flugiðnaðarins þar í landi. Upphæðin á að nýtast félaginu sjálfu ásamt því að styðja við þarlend flugfélög.

Fram hefur komið að bandarísku flugfélögin hafi óskað eftir 50 milljörðum bandaríkjadala til að styðja við flugrekstur. Koma framangreindar beiðnir í kjölfar áhrifa kórónuveirunnar á félög í fluggeiranum. Donald Trump Bandaríkjaforseti hefur áður sagt að félögum innan fluggeirans verði veitt nauðsynleg aðstoð.

Til að bregðast við breyttu rekstrarumhverfi hefur fjöldi flugfélaga þurft að segja upp stórum hluta starfsmanna sinna. Hafa fjölmörg félög jafnvel gengið svo langt að draga starfsemina saman um 90% þegar í stað.

• Blogga um frétt