Viðskipti | mbl | 27.3.2020 | 14:44

Óttast skort á íbúðahúsnæði til lengri tíma

HMS segir að komið gæti til skort á íbúðarhúsnæði á komandi árum ef ekki verður haldið áfram að byggja nýjar íbúðir.

Ný talning Samtaka iðnaðarins (SI) á íbúðahúsnæði í byggingu sýnir að 42% færri íbúðir eru nú á fyrstu byggingarstigum á höfuðborgarsvæðinu en sambærileg talning sýndi síðasta vor. Ef ekki verður brugðist við þessari stöðu þýðir það að innan fárra ára má búast við svipuðum skorti á íbúðarhúsnæði og þeim sem varð árið 2017. Þetta kemur fram hjá Húsnæðis- og mannvirkjastofnun (HMS).

Í greiningu HMS kemur fram að þrátt fyrir að meira hafi verið byggt af íbúðarhúsnæði undanfarin ár og að búast megi við auknu framboði vegna fækkunar erlendra ríkisborgara og minni Airbnb-útleigu vegna efnahagslegrar óvissu sem nú ríki, dugi það ekki til að mæta íbúðaþörf til lengri tíma. Halda þurfi áfram að byggja í samræmi við undirliggjandi íbúðaþörf, en HMS segir að til lengri tíma þurfi að byggja 1.800 íbúðir um allt land árlega til ársins 2040.

Frétt af mbl.is

42% færri íbúðir á frumstigi bygginga

Tímabundnar aðstæður kalli nú á að gætt verði aukinnar varkárni á næstu 2-4 árum og mælir stofnunin með að miðað verði við 1.500 íbúða þörf á ári þangað til markaðurinn nær jafnvægi á ný. „Þrátt fyrir að talsvert sé af nýjum íbúðum í sölu núna verður staðan fljótlega önnur ef samdráttur í nýbyggingum verður jafn mikill og talning SI sýnir. Það framboð sem er til staðar af nýju íbúðarhúsnæði í dag er mun minna en á fyrstu árunum eftir bankahrunið og því gæti alvarlegur húsnæðisskortur, með tilheyrandi hækkun fasteignaverðs, látið á sér á kræla á ný ef ekkert er að gert,” er haft eftir Hermanni Jónssyni, forstjóra HMS.

Samkvæmt talningu SI fækkaði íbúðum á fyrstu byggingarstigum, eða þeim sem ná „að fokheldu“ um ríflega 1.000 íbúðir frá sama tíma í fyrra, en það er um helmings fækkun frá fyrri spá. Leita þarf aftur til áranna 2011 og 2012 til að finna viðlíka samdrátt í byggingu nýrra íbúða.

HMS segir að enn sé óuppfyllt þörf fyrir nýjar íbúðir á landinu öllu, mestmegnis á höfuðborgarsvæðinu. Verði samdrátturinn núna viðlíkur því sem varð eftir hrunið náist markmiðið um 1.500 íbúðir ekki.