Heildarfjöldi greiddra gistinátta í febrúar síðastliðnum dróst saman um 12,7% samanborið við febrúar 2019. Þar af fækkaði gistinóttum á hótelum um 4% og um 24% á gistiheimilum. Þá var 43% fækkun gistinátta á stöðum sem miðla gistingu í gegnum Airbnb og svipaðar síður og á öðrum tegundum gististaða (farfuglaheimilum, orlofshúsum o.s.frv.) var 1% aukning frá fyrra ári. Þetta kemur fram í frétt á vef Hagstofu Íslands.
Greiddar gistinætur ferðamanna á öllum gististöðum voru um 555.000 í febrúar en þær voru um 636.000 í sama mánuði árið áður. Gistinætur á hótelum og gistiheimilum voru um 387.000, þar af 336.000 á hótelum. Gistinætur í íbúðagistingu, farfuglaheimilum o.þ.h. voru um 102.000 og um 67.000 á stöðum sem miðla gistingu í gegnum vefsíður á borð við Airbnb.
Gistinætur á hótelum í febrúar síðastliðnum voru 336.000 sem er 4% fækkun frá sama mánuði árið áður. Gistinóttum á hótelum fækkaði hlutfallslega mest á Suðurlandi (18%), Suðurnesjum (13%) og Norðurlandi (12%) en fjölgaði nokkuð á Austurlandi (8%). Um 66% allra hótelgistinátta voru á höfuðborgarsvæðinu, eða 222.100, sem var 2% aukning frá febrúar 2019.
Herbergjanýting á hótelum í febrúar 2019 var 60,1% og dróst saman um 6,9 prósentustig frá fyrra ári. Á sama tíma jókst framboð gistirýmis um 6,1% mælt í fjölda herbergja. Nýtingin í febrúar var best á höfuðborgarsvæðinu eða 79,4%.
Um 89% gistinátta á hótelum voru skráðar á erlenda ferðamenn eða 298.400. Ferðamenn frá Bretlandi voru með flestar gistinætur (95.600), þar á eftir komu Bandaríkjamenn (66.700) og Þjóðverjar (23.300) en gistinætur Íslendinga voru 37.700. Áhrifa Covid-19 faraldursins var á þessum tíma helst tekið að gæta í því að 55% samdráttur var á hótelgistinóttum Kínverja frá sama mánuði fyrra árs, en þær voru 13.900.