Ofurfjárfestirinn Carl Icahn seldi í gær öll hlutabréf sín í bílaleigunni Hertz. Að því er fram kemur í fréttamiðlum vestanhafs átti auðkýfingurinn ríflega 39% hlut í fyrirtækinu. Í tilkynningu frá fjárfestingafyrirtæki Icahns kemur fram að með sölunni hafi félagið tapað umtalsverðum fjárhæðum.
Gengi bréfanna við sölu var 0,72 Bandaríkjadalir á hlut, en alls átti Icahn ríflega 55 milljónir hluta. Nam tap fjárfestisins vegna sölunnar rétt tæplega 1,6 milljarði Bandaríkjadala. Haft var eftir fjárfestinum að þrátt fyrir söluna væri hann bjartsýnn á framtíð bílaleigunnar.
Eins og áður hefur komið fram sótti Hertz nýverið um greiðslustöðvun eftir slæm áhrif kórónuveirufaraldursins á rekstur fyrirtækisins. Alþjóðlegur rekstur fyrirtækisins, meðal annars í Evrópu, Ástralíu og á Nýja-Sjálandi fellur ekki undir greiðslustöðvunina, heldur nær hún eingöngu til Bandaríkjanna.