Lægsta tilboðið aðeins 11% af áætlun

Tilboð sem opnuð voru nýlega í verkefni sem tengist uppbyggingu nýja Landspítalans við Hringbraut voru öll umtalsvert undir kostnaðaráætlun. Lægsta tilboðið var aðeins 11% af áætluninni og það næsta var tæplega 28% af áætlun. Hæsta boðið var 68% af kostnaðaráætlun, sem sagt vel undir áætlun, en engu að síður rúmlega sex falt hærra en lægsta boð.

Um er að ræða útboð Hringbrautarverkefnisins á yfirferð séruppdrátta fyrir meðferðarkjarna sem verður hluti af nýja Landspítalanum. Í heild er fjöldi sérteikninga í meðferðarkjarnanum 4.700 talsins og verður unnið í samvinnu byggingarfulltrúann í Reykjavík og Húsnæðis- og mannvirkjastofnun. Á skoðunaraðilinn að kanna hvort séruppdrættirnir sem lagðir verða fram af hönnuðum séu í samræmi við lög, en meðferðarkjarninn er stærsta bygging á skipulagsreit verkefnisins.

Gunnar Svavarsson framkvæmdastjóri Hringbrautarverkefnisins Ljósmynd/Aðsend

Gunnar Svavarsson, framkvæmdastjóri Hringbrautarverkefnisins, segir erfitt að átta sig á af hverju þessi mikli munur sé á milli tilboða. Segir hann þetta í fyrsta skipti sem jafn stórt útboð og vel skilgreint fari fram vegna yfirferðar á séruppdráttum. „Vel megi vera að tilboðsgjafar renni blint í sjóinn,“ segir Gunnar. Hann tekur þó fram að allir aðilar eigi að vera vel meðvitaðir um umfangið og kröfurnar, enda sé um lokað útboð í kjölfar forvals að ræða þar sem hæfis- og hæfnismál hafi verið metin.

Spurður hvort hann telji efnahagsástandið spila eitthvað inn í upphæð tilboðanna segir Gunnar að hugsanlega sé staðan ólík milli mismunandi aðila. „Það er ljóst að samdráttur hjá þessum aðilum er verulegur umliðna mánuði sem gæti endurspeglað sig í mikilli samkeppni og lágum verðum.“

Nú tekur við yfirferð tilboðanna og þeirra útreikninga sem þar eru á bak við. Gunnar segir að þá komi í ljós hvort um einhverjar reikningsskekkjur sé að ræða, „sem ég á ekki von á,“ bætir hann við.

Tilboð bárust frá eftirtöldum aðilum í verkið:

• EFLA hf. kr. 34.780.000.
• Ferill verkfræðistofa kr. 78.955.300.
• Frumherji hf. kr. 50.196.000.
• Hnit verkfræðistofa hf kr. 85.413.100.
• Verkís kr. 13.818.000.

Kostnaðaráætlun verksins er kr. 125.273.659, en öll verð eru án virðisaukaskatts.

• Blogga um frétt