Ull af forystufé í fatnaði

Herrafataverzlun Kormáks & Skjaldar hyggst setja á markað fatnað og fylgihluti úr tweed-efni sem ofið er úr ull af íslensku forystufé.

Skjöldur Sigurjónsson, sem rekur verslunina í samstarfi við Kormák Geirharðsson, segir í samtali við ViðskiptaMoggann að ullin af forystufénu hagi sér öðruvísi en ull af öðru íslensku sauðfé, og minni á kasmírull. „Þetta er væntanlegt á markaðinn frá okkur nú í haust.“

Í samtalinu segir Skjöldur einnig frá því að fyrirtækið hafi kynnt á Hönnunarmars, sem er nýafstaðinn, íslensk jakkaföt og fylgihluti sem unnin eru úr tweed-efni úr íslenskri ull. Með því er fyrirtækið að endurvekja framleiðslu sem síðast var stunduð fyrir um hálfri öld, en framleiðsla efnisins fer fram í verksmiðju í Austurríki. Stefnt er einnig að því að selja tweed-efnið til útlanda og klæða með því húsgögn.