Breska útgáfan Reach, sem meðal annars gefur út dagblöðin Daily Mirror og Daily Express, ætlar að segja upp 550 starfsmönnum vegna breyttra aðstæðna vegna kórónuveirunnar. Vegna COVID-19 færðist lesturinn frá prentmiðlum yfir á netið og auglýsingatekjur hrundu að því er segir í tilkynningu frá Reach.
Að sögn forstjóra félagsins, Jim Mullen, færðist lesturinn yfir á netmiðla útgáfunnar á tímum kórónuveirunnar og á sama tíma dró verulega úr auglýsingatekjum því svo virðist sem tekjurnar hafi ekki færst yfir á netútgáfuna.
Um er að ræða 12% af heildarfjölda starfsmanna Reach og er talið að þetta geti sparað um 35 milljónir punda árlega. Reach gefur einnig út fjölda héraðsdagblaða. Endurskipulagning rekstrar mun kosta félagið 20 milljónir punda.