Loka álverum á Nýja-Sjálandi

Álverið í Straumsvík.
Álverið í Straumsvík. mbl.is/Kristinn Magnússon

Rio Tinto ætlar að loka álverum sínum í Nýja-Sjálandi á næsta ári vegna þess hve hár orkukostnaðurinn er og vegna þess hversu erfiðar aðstæður eru í áliðnaði framundan. 

Álframleiðslu Rio Tinto, Tiwai Point og New Zealand Aluminium Smelters (NZAS) verður lokað 31. ágúst 2021 og er þetta í samræmi við endurskoðun á rekstri álvera fyrirtækisins sem hófst í október í fyrra. Árið 2014 var greint frá því að árið á undan hafi  nýsjálenskir skattgreiðendur neyðst til að reiða fram þrjátíu milljónir dala til dótturfélags Rio Tinto í Nýja-Sjálandi. Fram kom í nýsjálenskum fjölmiðlum að félagið hafi hótað því að loka álverinu Tiwai Point í suðurhluta landsins ef það fengi ekki orku á lægra verði.

„Þrátt fyrir ábendingar fjármálaráðuneytisins um að það væri ekki skynsamlegt að niðurgreiða orkuna til álversins var það að lokum samþykkt. Benti fjármálaráðuneytið meðal annars á að niðurgreiðslan fæli í sér mikla tilfærslu á fjármagni frá Ný-Sjálendingum til hluthafa Rio Tinto,“ sagði í frétt Morgunblaðsins árið 2014 af málinu. 

Í tilkynningu frá Rio Tinto nú kemur fram að helstu ástæður ákvörðunarinnar um að hætta álframleiðslu á Nýja-Sjálandi sé hár rafmagnskostnaður og horfur til skemmri tíma á álmarkaði. 

Rio Tinto á og rekur álverið í Straumsvík og tilkynnti í febrúar að félagið ætlaði að hefja sér­staka end­ur­skoðun á starf­semi ál­vers­ins í Straums­vík (ISAL) til að meta rekstr­ar­hæfi þess til framtíðar og leita leiða til þess að bæta sam­keppn­is­stöðu þess.

Í fyr­ir­hugaðri end­ur­skoðun verða all­ar leiðir skoðaðar, þar á meðal frek­ari fram­leiðslum­innk­un og mögu­lega lok­un. End­ur­skoðun­ar­ferl­inu verður lokið á fyrri helm­ingi árs 2020. Vegna ta­prekstr­ar hef­ur fram­leiðsla ISAL þegar verið minnkuð í 85 pró­sent af af­kasta­getu ál­vers­ins. ISAL er að fullu í eigu Rio Tinto. Í Straums­vík starfa um 500 manns.

Rio Tinto á 79,36% hlut í NZAS og japanska fyrirtækið Sumitomo Chemical á 20,64%. Á fyrstu þremur mánuðum ársins voru þar framleidd 67 þúsund tonn og 279 þúsund tonn í fyrra. NZAS var rekið með tapi í fyrra.

Álverið í Straumsvík framleiddi 45 þúsund tonn á fyrstu þremur mánuðum ársins og í fyrra voru þar framleidd 184 þúsund tonn af súráli.

Sjá nánar hér

mbl.is
  ISK
  USD
  EUR
  GBP
  CAD
  DKK
  NOK
  SEK
  ISK
  USD
  EUR
  GBP
  CAD
  DKK
  NOK
  SEK