Framtíðarvirði ÍSAL fært niður að fullu
Setja bókamerki
Alþjóðlega námufyrirtækið Rio Tinto, sem meðal annars rekur álverið í Straumsvík, birti árshlutareikning sinn í dag. Þar kemur meðal annars fram að fyrirtækið hafi fært niður eignir fyrirtækisins vegna álversins um 269 milljónir Bandaríkjadala, eða sem nemur 37 milljörðum íslenskra króna. Er þar um að ræða bókfærða eign vegna væntra tekna í framtíðinni. Telur fyrirtækið ekkert virði í slíkri eign lengur og hefur niðurfært virði hennar niður í ekki neitt.
Rio Tinto kærði í síðustu viku Landsvirkjun til Samkeppniseftirlitsins og sagði raforkuframleiðandann hafa misnotað markaðsráðandi stöðu sína á raforkumarkaði. Kom jafnframt fram að ef Landsvirkjun léti ekki af „skaðlegri háttsemi sinni“ hefði Rio Tinto ekki annan kost en að íhuga að segja upp orkusamningi sínum og virkja áætlun um lokun. Sagði Rio Tinto jafnframt að fyrirtækið gæti ekki haldið áfram að framleiða ál hér á landi nema verðlagningin væri gagnsæ og sanngjörn.
Í framhaldinu svaraði forstjóri Landsvirkjunar því til að Rio Tinto hefði neitað að aflétta trúnaði af samningi sínum við Landsvirkjun. Iðnaðarráðherra hefur jafnframt tekið undir að rétt væri að samningurinn yrði gerður opinber, en Rio Tinto hefur hins vegar gefið upp að fyrirtækið telji ekki rétt að opna orkusamninginn nema önnur stóriðjufyrirtæki geri það líka.
Í árshlutareikningi Rio Tinto kemur annars fram að félagið hafi hagnast um 3,3 milljarða Bandaríkjadala á árshlutanum, eða rúmlega 450 milljarða íslenskra króna. Er það samdráttur um 20% miðað við sama árshluta í fyrra, en þá var hagnaðurinn 4,1 milljarður dala.
Kórónuveirufaraldurinn hefur talsverð áhrif á afkomuna, en áhrifa faraldursins gætir meðal annars í hráefnaverði, en í uppgjörinu er sérstaklega vísað til þess að ál- og koparverð hafi lækkað á árshlutanum.
Sala fyrirtækisins á heimsvísu nam 5,6 milljörðum dala, en hafði á fyrri hluta ársins áður verið 6,4 milljarðar. Er það samdráttur um 12%.
Félagið áætlar að greiða út 2,5 milljarða dala í arð á árinu, en það jafngildir 155 sentum á hlut.
Þrjú og hálft ár fyrir skotárás í Úlfarsárdal
Stóraukið fé til samgöngusáttmála
Aukin tíðni þungunarrofa hjá yngsta aldurshópnum
Kvikan virðist nú skiptast til helminga
Myndskeið: Braut rúðurnar og rölti svo í burtu
Fjárfestingin 115 milljarðar króna
„Tíminn er runninn út fyrir Kristján Loftsson“
Starfsfólk gæti fengið reikning frá Skattinum