Helgi ráðinn framkvæmdastjóri Verne Global hf.

Helgi Helgason hefur verið ráðinn framkvæmdastjóri gagnavers Verne Global á Íslandi. Helgi gekk til liðs við Verne Global árið 2008, þar sem hann gegndi lykilhlutverki í framþróun fyrirtækisins frá því að vera sprotafyrirtæki í fyrirtæki sem býður upp á háþróaðar gagnaverslausnir á heimsmælikvarða. 

Þetta kemur fram tilkynningu frá Verne Global.

Starf Helga felst í því að tryggja áframhaldandi þjónustu í hæsta gæðaflokki til viðskiptavina Verne Global samhliða því að hafa yfirumsjón með daglegum rekstri, viðhaldi og að tryggja að öryggis- og reglugerðakröfur séu uppfylltar.

Helgi er menntaður tölvutæknifræðingur frá SDU í Danmörku og er með meistaragráðu í forystu og stjórnun frá Háskólanum á Bifröst. Verne Global býður upp á sjálfbærar hágæða gagnaverslausnir í öruggu umhverfi.

Fjárfestu nýlega fyrir 27 milljónir dala

„Nýlega tilkynntum við um fjárfestingu upp á 27 milljónir dollara fyrir stækkun gagnavers Verne Global á Íslandi. Umfangsmikil reynsla Helga og leiðtogahæfni munu koma til með að vera ómetanleg í þeim vexti sem framundan er,“ er haft eftir Dominic Ward, forstjóra Verne Global í tilkynningunni.

„Við erum hæstánægð að Helgi skuli leiða stækkun gagnaversins til að auka afkastagetu og útvíkka þjónustuframboð, ásamt því að tryggja að núverandi viðskiptavinir njóta áframhaldandi þjónustu í hæðsta gæðaflokki,“ bætir hann við.

Spenntur að taka við

„Ég er spenntur að taka við stöðu framkvæmdastjóra og taka þátt í því að þróa áfram gagnaver á heimsmælikvarða, þar sem við nýtum þá sérstöðu sem Ísland hefur upp á bjóða varðandi hreina orku, öruggt rafmagn og hagstæða loftkælingu,“ er haft eftir Helga.

„Ég hlakka til að leiða áfram starfsmenn Verne Global á Íslandi, þar sem við munum sem áður kappkosta að bjóða upp á þá frábæra þjónustu sem viðskiptavinir okkar kunna að meta og endurspeglast í áframhaldandi vexti viðskiptavina okkar til margra ára,“ segir hann jafnframt.

• Blogga um frétt