Olíufélagið Skeljungur festi á fyrri árshelmingi kaup á fjórðungshlut í Brauð & Co og Gló ehf., en þau reka samnefnd bakarí og veitingastaði.
Greint er frá kaupunum í árshlutauppgjöri Skeljungs sem var birt fyrr í dag.
„Markmiðið með þessum fjárfestingum er að nýta staðsetningar okkar betur ásamt því að bjóða upp á fjölbreyttara vöruúrval í verslunum okkar,“ er haft eftir Árna Pétri Jónssyni, forstjóra Skeljungs, í tilkynningu.
Kaupverðið er ekki gefið upp en hjónin Birgir Þór Bieltvedt og Eygló Björk Kjartansdóttir hafa verið meirihlutaeigendur í bæði Brauði & Co og Gló undanfarin ár.
Bakarinn Ágúst Einþórsson seldi í fyrra hlut sinn í Brauði & Co til meðstofnenda sinna, þeirra Birgis og Þóris Snæs Sigurjónssonar.