Samkvæmt drögum að uppgjöri Haga má gera ráð fyrir að rekstrarhagnaður fyrir afskriftir (EBITDA) á öðrum ársfjórðungi verði á bilinu 2.850 til 3.000 milljónir króna, samanborið við 2.489 milljónir króna á síðasta rekstrarári. Þetta kemur fram í tilkynningu.
28. október næstkomandi munu Hagar birta uppgjör fyrstu sex mánaða rekstrarársins 2020/21. Nú liggja fyrir fyrstu drög að uppgjöri og stefnir í að afkoma samstæðunnar á öðrum ársfjórðungi verði heldur betri en afkoma á sama fjórðungi á fyrra ári.
„Miðað við ofangreint gerir mat stjórnenda ráð fyrir því að rekstrarhagnaður fyrir afskriftir samstæðunnar (EBITDA) á fyrri árshelmingi, þ.e. tímabilið 1. mars til 31. ágúst 2020, verði á bilinu 4.150 til 4.300 milljónir króna, samanborið við 4.523 milljónir króna á fyrra rekstrarári“, segir í tilkynningunni.
Hagar starfrækja 40 matvöruverslanir, 28 Olís þjónustustöðvar, 43 ÓB-stöðvar, tvær birgðaverslanir, þrjár sérvöruverslanir, tvö apótek, tvö vöruhús og tvær framleiðslustöðvar. Undir hatti Haga verslana ehf. eru fyrirtækin Bónus, Hagkaup, Aðföng og Útilíf.