Samkvæmt stjórnendauppgjöri Eimskipafélagsins fyrir þriðja ársfjórðung er útlit fyrir betri afkomu á ársfjórðungnum en á sama tíma í fyrra. Þetta kemur fram í tilkynningu frá félaginu til Kauphallarinnar.
Þar segir að útlit sé fyrir að rekstrarhagnaður fyrir skatta, afskriftir og fjármagnsliði (EBITDA) verði á bilinu 21,5 til 22 milljónir evra, en í fyrra var sá rekstrarhagnaður 20,3 milljónir á sama ársfjórðungi.
Þá gerir félagið ráð fyrir að rekstrarhagnaður fyrir skatta (EBIT) verði 10,1 til 10,6 milljónir evra, en var á þriðja ársfjórðungi í fyrra 9,2 milljónir evra.
Flutningsmagn í áætlunarsiglingum jókst lítillega samanborið við sama ársfjórðung síðasta árs eftir samdrátt á fyrstu tveimur fjórðungum þessa árs. Þá var magn í frystiflutningsmiðlun á pari við sama fjórðung síðasta árs.
Félagið tekur fram að áhrif Covid-19 faraldursins á alþjóðahagkerfið séu áfram óljós fyrir komandi mánuði. Félagið hefur enn ekki endurvakið afkomuspá sína vegna þeirrar miklu óvissu sem er á mörkuðum, en uppgjör ársfjórðungsins verður birt eftir lokun markaða 19. nóvember.