Með Morgunblaðinu í morgun fylgdi sérblað þar sem fjallað er um þau 842 fyrirtæki sem komast á lista Creditinfo yfir framúrskarandi fyrirtæki 2020. Byggir samsetning listans á gagnreyndri aðferð á ýmsum þáttum í rekstri íslenskra fyrirtækja sem m.a. nær til arðsemi, eiginfjárhlutfalls, eignastöðu og skilvísi fyrirtækjanna.
Brynja Baldursdóttir, framkvæmdastjóri Creditinfo, segir í viðtali í blaðinu að listinn sé mikilvægur, ekki síst vegna þess að þar er að finna jákvæðar fyrirmyndir fyrir íslenskt atvinnulíf.
„Það var algengur misskilningur hér á árum áður að viðurkenningin snerist um að verðlauna fyrirtækin sem græða mest en nú held ég að flestir séu meðvitaðir um að Framúrskarandi fyrirtæki eru fyrirtæki sem hafa sýnt fram á stöðugleika og ábyrgð í sínum rekstri,“ segir Brynja.
Bendir hún á að listinn sé ákveðið heilbrigðisvottorð og að þau fyrirtæki sem komist á hann vilji almennt láta viðskiptavini sína, samstarfsaðila og samfélagið í heild vita að þau hafi staðist þær ströngu kröfur sem gerðar eru til þeirra sem listann fylla.
„Það skiptir máli fyrir íslenskt efnahagslíf að sem flest fyrirtæki stundi heilbrigðan og stöðugan rekstur. Okkar von er sú að með því að veita þessa viðurkenningu náum við að draga fram jákvæðar fyrirmyndir fyrir íslenskt atvinnulíf svo það nái áfram að blómstra. Á þessum krefjandi tímum sem við stöndum frammi fyrir núna er sérstaklega mikilvægt að hvetja íslenskt atvinnulíf til dáða og fagna framúrskarandi árangri í rekstri,“ segir Brynja.
Í fyrrnefndu sérblaði, sem er 96 síður að lengd, er að finna tölfræði varðandi fyrirtækjalistann og einnig hvernig hann hefur þróast þau 11 ár sem Creditinfo hefur unnið hann. Þar er einnig að finna viðtöl við fjölbreyttan hóp fyrirtækjastjórnenda sem hver og einn miðlar af reynslu sinni til lesenda. Viðtölin og listann er svo að finna á sérstöku vefsvæði hér á mbl.is sem er helgað umfjöllun um framúrskarandi fyrirtæki á Íslandi.
Á síðustu árum hefur farið fram vegleg verðlaunahátíð í Hörpu þar sem fulltrúum fyrirtækjanna sem á listanum er boðið að taka þátt í dagskrá sem helguð er framúrskaranid fyrirtækjum á Íslandi. Vegna kórónuveirunnar var ekki mögulegt að halda slíkan viðburð að þessu sinni en þess í stað er upplýsingum um listann og fyrirtækin sem á honum eru, miðlað með afgerandi hætti. Mun þess sjá stað á mbl.is á komandi dögum.