„Hirzlan er 28 ára gamalt fyrirtæki á næsta ári. Við fórum hins vegar í miklar breytingar á því þegar við keyptum það. Við fluttum í 350 fermetra sýningarrými í Síðumúla og höfum síðan komið okkur upp 1.000 fermetra vöruhúsi. Við erum núna að vinna innan rammasamnings við Ríkiskaup og höfum rétt tæplega nífaldað veltuna frá því að við tókum við fyrirtækinu. Fyrir þetta erum við afar þakklát og ánægð.“
Þannig lýsir Stefán Stefánsson umsvifum Hirzlunnar á síðustu árum en árið 2016 keypti hann ásamt konu sinni og Leifi Aðalsteinssyni fyrirtækið. Hirzlan er nú á lista Creditinfo yfir framúrskarandi fyrirtæki 2020. Velta fyrirtækisins í fyrra nam u.þ.b. 340 milljónum króna.
Stefán segir enn tækifæri fyrir Hirzluna til að vaxa og að markið sé sett á 20% markaðshlutdeild. Nýir eigendur hafi séð tækifæri á markaðnum með skrifstofuhúsgögn og þess vegna slegið til. Fákeppni hafi verið á markaðnum og verð of hátt. Í dag er Hirzlan með rammasamning við Ríkiskaup sem Stefán segir mikilvægan fyrir fyrirtækið.
„Það skiptir miklu máli að benda á hvar hagstæðasta verðið fæst. Rammasamningurinn hefur reynst okkur mjög mikilvægur en hann er líka ákveðinn gæðastimpill. Það fær ekkert fyrirtæki svona samning nema það geti sýnt fram á ákveðna veltu, að allar vörur séu vottaðar og þjónustan sé góð.“
Heildarlistann yfir fyrirtækin 842 sem teljast framúrskarandi að mati Creditinfo 2020 má finna hér.