Fréttir Stöðvar 2 aðeins aðgengilegar áskrifendum

Stöð 2 verður hrein áskriftarstöð. Fréttir og tengt efni aðeins …
Stöð 2 verður hrein áskriftarstöð. Fréttir og tengt efni aðeins aðgengilegt áskrifendum. Ljósmynd/Aðsend

Frá og með 18. janúar verða kvöldfréttir Stöðvar 2 aðeins aðgengilegar áskrifendum og þannig verður grundvöllur fréttastofu Stöðvar 2, Vísis og Bylgjunnar tryggður til framtíðar. Fréttir verða áfram öllum aðgengilegar í beinni útsendingu á Bylgjunni og birtast í formi myndbrota á Vísi eftir að útsendingu lýkur á Stöð 2. 

Þetta kemur fram í tilkynningu frá Sýn. Þar segir ennfremur að í 34 ár hafi kvöldfréttir Stöðvar 2 verið hluti af daglegu lífi þjóðarinnar. „Á þessum tíma hefur umhverfi fjölmiðla tekið miklum breytingum. Stöð 2 hefur verið leiðandi og ætlar sér að vera það áfram.“

Ætlað að tryggja fréttastofuna enn frekar í sessi

„Þetta er sóknaraðgerð. Með þessari aðgerð erum við að tryggja fréttastofuna enn frekar í sessi. Við erum þess fullviss að með stuðningi áskrifenda skapist forsendur til að standa vörð um öfluga fréttaþjónustu og framleiðslu innlends efnis. Á síðasta ári framleiddi Stöð 2 alls 48 íslenskar þáttaraðir og viðburði sem er gríðarleg aukning frá fyrri árum. Við höldum ótrauð áfram á sömu braut og kynnum á sama tíma fleiri viðskiptavinum Stöð2+, stærstu efnisveitu landsins með íslenskt efni, á áður óþekktu verði,“ segir Þórhallur Gunnarsson, framkvæmdastjóri fjölmiðla Stöðvar 2, í tilkynningunni. 

Breyttar aðstæður kalli á nýjar áherslur

Þórir Guðmundsson, ritstjóri fréttastofu Stöðvar 2, Vísis og Bylgjunnar, segir að þessar breytingar geri þeim kleift að standa vörð um öfluga fréttaþjónustu í sjónvarpi. „Breyttar aðstæður kalla á nýjar áherslur í fjölmiðlun en það sem breytist ekki er áhersla okkar á traust, vandvirkni og nálægð við fólk. Fréttastofan verður því áfram leiðandi í miðlun frétta – á Stöð 2, Vísi og Bylgjunni,“ segir Þórir.

Þá kemur fram í tilkynningunni, að áskrift að Stöð 2 fylgi framvegis aðgangur að Stöð 2+ (áður Maraþon). Það kosti kr. 7.990 kr. á mánuði. 

„Á sama tíma verður breyting á áskriftarskilmálum sem felst í því að engin binding er á áskriftum umfram líðandi mánuð. Hægt er að segja upp eða gera breytingar á áskriftum fyrir 25. hvers mánaðar sem taka þá gildi fyrsta dag næsta mánaðar.“

mbl.is
  ISK
  USD
  EUR
  GBP
  CAD
  DKK
  NOK
  SEK
  ISK
  USD
  EUR
  GBP
  CAD
  DKK
  NOK
  SEK