Lækka vexti og hækka veðhlutfall

Í Grafarholti.
Í Grafarholti. mbl.is/Sigurður Bogi

Nokkrar breytingar voru gerðar á lánareglum Gildis á fundi stjórnar lífeyrissjóðsins í síðustu viku.

Veðhlutfall lána hækkar í 75% en það var 70% áður. Eftir breytinguna fá sjóðfélagar grunnlán fyrir allt að 65% af virði eignar í stað 60% áður. Ofan á það geta sjóðfélagar fengið viðbótarlán upp í 75% af virði eignar.

Óverðtryggðir breytilegir vextir lækka um 20 punkta, sem þýðir að vaxtakjör óverðtryggðra lána hjá Gildi eru ein þau allra bestu sem í boði eru, að því er segir í tilkynningu.

Verðtryggðir breytilegir vextir lækka um 10 punkta.

Fram kemur að síðustu mánuði hafi uppgreiðslur lána hjá lífeyrissjóðum verið talsvert umfram nýjar lánveitingar. Með breytingunni á lánareglum og vaxtakjörum nú vilji stjórn Gildis bregðast við þessari þróun.

Breytingin á veðhlutfalli lána hefur þegar tekið gildi en ný vaxtatafla tekur gildi 5. febrúar.

„Landsmönnum hafa síðustu ár boðist lán á allt öðrum og betri kjörum en áður þekktist og það má að stærstum hluta rekja til sterkrar innkomu lífeyrissjóða á lánamarkaðinn á árunum 2015 til 2016. Síðustu mánuði hafa bankarnir náð að bregðast við, lækkað vexti á lánum sínum, og orðið ráðandi á fasteignalánamarkaði á ný. Með breytingunni nú vill Gildi bregðast við þessari þróun og bjóða upp á lán á kjörum sem eru að fullu samkeppnishæf,“ segir í tilkynningunni.

Þar segir einnig að breytingin gefi kost á hærri lántöku sem muni sérstaklega koma fyrstu kaupendum íbúða, yngra fólki og tekjulágu, til góða.

mbl.is
  ISK
  USD
  EUR
  GBP
  CAD
  DKK
  NOK
  SEK
  ISK
  USD
  EUR
  GBP
  CAD
  DKK
  NOK
  SEK