Ölgerðin hefur sagt sig úr SI

Ölgerðin hefur sagt sig úr Samtökum iðnaðarins (SI). Ástæðan þar að baki er óánægja með stefnu samtakanna í ákveðnum málum. Þetta segir Andri Þór Guðmundsson, forstjóri Ölgerðarinnar, í samtali við ViðskiptaMoggann.

„Við höfum skráð okkur úr Samtökum iðnaðarins. Mér fannst við einfaldlega ekki vera að fá þá þjónustu sem við þurfum. Miðað við peningana sem við erum að borga þarna inn er of lítil áhersla á þeim málum sem við þurfum aðstoð við,“ segir Andri.

Sigurður Hannesson, framkvæmdastjóri SI, kvaðst ekki vilja tjá sig um afskráningar einstakra fyrirtækja. „Ég get ekki tjáð mig um hverjir eru félagsmenn og hverjir ekki. Við erum með svona 1.400 félagsmenn og það er alltaf einhver hreyfing á þeim lista,“ segir Sigurður.