Hagfræðideild Landsbankans spáir 0,3% hækkun á vísitölu neysluverðs í júlí. Gangi spáin eftir hækkar verðbólgan úr 4,3% í 4,4%.
Fram kemur í Hagsjá Landsbankans að þeir liðir sem hafi mest áhrif til hækkunar séu flugfargjöld til útlanda, reiknuð húsaleiga og bensín, á meðan föt, skór, húsgögn og heimilisbúnaður hafi mest áhrif til lækkunar.
Hagfræðideild hafði gert ráð fyrir að vísitalan yrði óbreytt á milli mánaða, en munurinn skýrist af því að bensín hefur hækkað meira í verði en von var á, að því er segir í Hagsjá.
Hagfræðideild gerir ráð fyrir að vísitala neysluverðs hækki um 0,3% í ágúst og september og um 0,4% í október. Gangi það eftir mun verðbólga mælast 4,1% í október.