Icelandair Group hefur skrifað undir tvær viljayfirlýsingar um að kanna möguleika á orkuskiptum í innanlandsflugi félagsins.
Þetta kemur fram í tilkynningu frá félaginu.
Skrifað var undir viljayfirlýsingu við Universal Hydrogen annars vegar, sem hannað hefur orkuskiptabúnað sem gæti breytt Dash-8-vélum Icelandair í vetnisknúnar vélar, og við Heart Aerospace hins vegar, sem vinnur að þróun farþegaflugvéla sem ganga fyrir rafmagni.
Til þess að ná alþjóðlegum viðmiðum um kolefnislosun er ljóst að þörf er á umhverfisvænum lausnum í flugi sem hægt er að taka í notkun sem fyrst.
„Stuttar flugleiðir og greiður aðgangur að raforku af endurnýjanlegum uppruna setur Ísland í lykilstöðu hvað varðar orkuskipti í innanlandsflugi. Verkefnin falla einnig vel að stefnuramma stjórnvalda um framtíð ferðaþjónustu sem miðar að því að gera Ísland leiðandi í sjálfbærni.
Icelandair hefur unnið með Heart Aerospace um nokkurt skeið og mun á næstunni setja af stað greiningarvinnu í samvinnu við Universal Hydrogen.
Á sama tíma mun félagið hefja samtal við helstu hagaðila, svo sem rafmagns- og vetnisframleiðendur, flutningafyrirtæki og flugvallarekendur,“ segir í tilkynningu.