Krónan mun á morgun, fimmtudag, opna nýja verslun í Borgartúni 26. Ólíkt flestum öðrum verslunum Krónunnar verður verslunin í Borgartúni opin frá klukkan átta á morgnana alla daga vikunnar.
„Það starfar umtalsverður fjöldi fólks hér í nágrenninu og við viljum gjarnan þjónusta þann hóp,“ segir Ásta Sigríður Fjeldsted, framkvæmdastjóri Krónunnar, í samtali við ViðskiptaMoggann.
„Af þeirri ástæðu munum við opna snemma þannig að fólk hafi möguleika á því að grípa vörur með sér áður en það mætir í vinnu, en að sama skapi gerum við ráð fyrir viðskiptavinum í hádeginu. Staðsetning verslunarinnar hentar sömuleiðis vel fyrir fólk á leið úr vinnu síðdegis þegar það þarf að kaupa í kvöldmatinn.“
Ásta segir verslunina einnig bjóða upp á aukið úrval af tilbúnum réttum og sé hugsuð fyrir þann hraða sem einkennir Borgartúnið. Verslunin sjálf er rúmgóð, um 700 m² að stærð. „Vöruúrvalið svarar kalli þeirra sem starfa á svæðinu en að sama skapi íbúum í grenndinni, enda hefur uppbyggingin verið töluverð hér í nágrenninu á liðnum árum,“ segir hún.
Lestu meira um málið í ViðskiptaMogganum í dag.