Hlutir í Ölgerðinni seldir á 8,9 kr. á hlut

Um 30% hlutur verður boðinn út í hlutafjárútboði Ölgerðarinnar sem hefst í byrjun næstu viku. Félagið er metið á um 25 milljarða króna og mun söluandvirði hlutarins því vera um 7,5 milljarðar króna.

Þetta kemur fram í fjárfestakynningu, sem birt var á vef Ölgerðarinnar í gærkvöldi. Hlutafjárútboðið mun, sem fyrr segir, hefjast á mánudag og standa út næstu viku. Tilkynnt verður um úthlutun mánudaginn 30. maí nk. Þá er ráðgert að viðskipti hefjist með bréf félagsins í Kauphöllinni 9. júní.

Rúmlega 330 þúsund hlutir, eða um 40% af útboðinu, verða seldir í tilboðsbók A á föstu gengi, 8,9 kr. á hlut. Hægt verður að bjóða á bilinu 100 þúsund krónur til 20 milljónir í áskriftir. Áskriftir verða skertar hlutfallslega en þó er stefnt að því að skerða ekki áskriftir undir einni milljón króna. Þá verða tæplega 500 þúsund hlutir, eða um 60% af útboðinu, seldir í tilboðsbók B á tilboðsverði – þó ekki undir 8,9 kr. á hlut, þar sem lágmarkstilboð í áskrift er 20 milljónir króna.

Þá kemur fram að núverandi hluthafar muni selja hlutfallslega jafn mikið af bréfum í félaginu að undanskildum lykilstarfsmönnum, sem munu ekki selja. Lífeyrissjóðir eiga nú um 37% hlut, einkafjárfestar um 25% hlut en tryggingafélög, bankar og verðbréfasjóðir um 16% hlut. Þá eiga þeir Andri Þór Guðmundsson, forstjóri Ölgerðarinnar, og Októ Einarsson, stjórnarformaður Ölgerðarinnar, saman 16% hlut í félaginu.

Ölgerðin mun ráðstafa um 17 milljón hlutum, sem er um 0,6% af útistandandi hlutum í félaginu, til starfsmanna. Hver starfsmaður fær bréf sem eru að verðmæti 500 þúsund krónur að hámarki.

• Blogga um frétt