Hagar menga minna

Heildarmagn úrgangs frá starfsemi Haga minnkaði um tæp ellefu prósent milli ára. Þetta segir í nýútgefinni skýrslu Haga um samfélagslega ábyrgð. Þar segir að heildarmagn úrgangsins hafi numið 5.077.119 kg fyrir árið 2021 sem jafngildir 10,8% lækkun frá 2020.

Í tilkynningu frá fyrirtækinu segir að það ásamt dótturfélögum hafi notast við umhverfisstjórnunarkerfi Klappa frá árinu 2019 til þess að mæla árangur félagsins í umhverfismálum. Samfélagsuppgjör rekstrarársins 2021 hefur nú verið tekið saman í samvinnu Klappa og Haga.

„Undanfarin ár höfum við lagt aukna áherslu á sjálfbærni í okkar rekstri og markað okkur skýra stefnu í þeim málum. Starfsemi Haga er viðamikil og ánægjulegt að sjá í uppgjörinu þann fjölbreytta árangur sem Hagar og dótturfélög hafa náð í sjálfbærni á liðnu rekstrarári. Til dæmis hefur heildar flokkunarhlutfall á sorpi frá fyrirtækjum Haga hækkaði um 2,3 % á sama tíma og heildarmagn úrgangs lækkaði um 10,8%,“ er haft eftir Finni Oddssyni forstjóra Haga í tilkynningu.

Losun minnkaði einnig

Finnur bætir við að Hagar hafi kolefnisjafnað reksturinn að fullu og heildarlosun fyrirtækisins á koltvísýringsgildum hafi lækkað um 6,4% milli 2020 og 2021.

Þá hafi góður árangur hafi náðst í verkefnum er stuðla að minni matarsóun. Bónus hafi markvisst unnið að því síðustu ár að búa til verðmæti úr matvörum sem ekki eru vænlegar til sölu vegna útlits eða nálgast síðasta söludag. Á síðasta rekstrarári hafi til að mynda 115 tonnum af ávöxtum og grænmeti verið bjargað frá sóun hjá Bónus.

,,Við vitum að það má alltaf gera betur þegar kemur að sjálfbærni og höfum því sett okkur metnaðarfull markmið fyrir komandi rekstrarár sem birt hafa verið í samfélagsskýrslum dótturfélaganna.“

„Starfsemi Haga er viðamikil og ánægjulegt að sjá í uppgjörinu þann fjölbreytta árangur sem Hagar og dótturfélög hafa náð í sjálfbærni á liðnu rekstrarári,“ er haft eftir Finni Oddsyni, forstjóra Haga. Ljósmynd/Aðsend

• Blogga um frétt