Viðskipti | mbl | 8.8.2022 | 11:15

Kaupir 50% í Jarðborunum fyrir 1,13 milljarða

Reikna megi með að fjárfesting Archer verði endanlega frágengin á þriðja fjórðungi þessa árs. Ljósmynd/Jarðboranir

Alþjóðlega bor- og þjónustufyrirtækið Archer Ltd. hefur keypt 50% hlutafjár í Jarðborunum hf. fyrir rúmlega 1,13 milljarða íslenskra króna, eða um 8,25 milljónir bandaríkjadala. Jarðboranir hf. verða því í jafnri eigu fjárfestingafélagsins Kaldbaks ehf., dótturfélags Samherja hf, og Archer eftir viðskiptin. Þetta kemur fram í tilkynningu frá Jarðborunum.

Fjárfesting Archer í Jarðborunum er sögð munu styðja við frekari vöxt fyrirtækisins, en Archer býr yfir meira en fjögurra áratuga reynslu á sviði borana, þjónustu við olíuleitarfyrirtæki og rannsókna á borholum.

Þá er fyrirtækið með starfsemi á 45 olíuborpöllum í fjórum heimsálfum og rekur 81 færanlegan bor á landi í Suður-Ameríku.

Mun efla verkefnaöflun erlendis

Reikna megi með að fjárfesting Archer verði endanlega frágengin á þriðja fjórðungi þessa árs þar sem hún er háð samþykki Samkeppniseftirlitsins.

„Með viðskiptunum kemur þessi trausti aðili inn í hluthafahópinn. Við erum bara mjög ánægðir með þetta,“ segir Sigurður Sigurðsson, forstjóri Jarðborana hf, í samtali við mbl.is.

Aðspurður segir hann að með viðskiptunum fái Jarðboranir sterkan og reynsluríkan bakhjarl inn í félagið.

„Hann mun bara efla okkur í verkefnaöflun, sérstaklega erlendis. Við lítum á þetta jákvæðum augum, fyrir okkur og starfsmennina.“

Hluti af mikilvægustu orkugjöfum framtíðarinnar

Dag Skindlo, forstjóri Archer, segir í tilkynningunni að jarðvarmi hafi beina skörun og samlegðaráhrif við kjarnaþjónustu Archer.

„Jarðboranir hf. á sér langa rekstrarsögu í alþjóðlegri starfsemi og er virt vörumerki í jarðhitaborunum og þjónustu við borholur. Jarðvarmamarkaðurinn er hluti af mikilvægustu orkugjöfum framtíðarinnar og á eftir að vaxa verulega á næstu áratugum að mati Alþjóðlegu orkumálastofnunarinnar (IEA) og annarra sérfræðinga í greininni,“ segir Skindlo.

„Áætlað er að árlegur fjöldi borhola, þar sem borað er eftir jarðhita, muni aukast úr 200 í 700 fyrir árið 2030. Ennfremur mun aukin áhersla á hitaveitur í Evrópu knýja áfram vöxt og tækniframfarir. Sérhæfing Archer er á sviði borana og þjónustu við borholur.

Við teljum að við getum nýtt færanlega bora okkar í jarðhitaverkefnum framtíðarinnar og nýtt alþjóðleg tengsl Archer við vöxt starfsemi á sviði jarðhitaborana. Við hlökkum til að halda áfram að þróa og stækka Jarðboranir hf. ásamt stjórnendum fyrirtækisins og meðhluthafa okkar, Kaldbaki.“