Vaxtahækkanir og verðbólga bíta á Orkuveituna

Vaxtahækkanir hafa aukið fjármagnskostnað Orkuveitu Reykjavíkur (OR). Þá birtist verðbólgan einnig í auknum verðbótum hjá fyrirtækinu. Hins vegar hefur eiginfjárhlutfallið hækkað. Vextir fara hækkandi á alþjóðamörkuðum og hafa Englandsbanki, Bandaríski seðlabankinn og sá evrópski allir hækkað vexti á síðustu vikum.

Benedikt Kjartan Magnússon, framkvæmdastjóri fjármála hjá Orkuveitunni, segir vaxtahækkanir erlendis hafa áhrif á fjárhag fyrirtækisins. Hluti af lántöku Orkuveitunnar sé enda í erlendri mynt.

„Því er vel að við höfum erlendar tekjur á móti en það er náttúruleg vörn fólgin í því. Hluti af okkar lánasamningum er með föstum vöxtum og þá erum við að hluta varin fyrir vaxtahækkunum þar til þeir samningar klárast. Hluti af okkar samningum er hins vegar með breytilegum vöxtum og eru vextir jafnan ákvarðaðir á 3-6 mánaða fresti. Þá taka erlendu lánin breytingum með vaxtahækkunum erlendis,“ segir Benedikt Kjartan.

Nánar er fjallað um málið í Morgunblaðinu í dag.