Helgi Bjarnason, forstjóri Vátryggingafélags Íslands (VÍS), hefur látið af störfum hjá félaginu. Guðný Helga Herbertsdóttir, framkvæmdastjóri sölu og þjónustu, mun taka tímabundið við starfi forstjóra.
Þetta kemur fram í tilkynningu frá VÍS til Kauphallarinnar nú undir kvöld. Þar kemur einnig fram að stjórn VÍS muni ráða nýjan forstjóra á næstunni og tilkynna um það sérstaklega. Samkvæmt heimildum Morgunblaðsins lét Helgi ekki af störfum að eigin frumkvæði.
Í tilkynningunni kemur fram að stjórn VÍS hafi markað stefnu sem feli í sér „ákveðin kaflaskil í rekstri félagsins“ eins og það er orðað.
Þannig sé það markmið stjórnar að gera VÍS að enn vænlegri fjárfestingakosti á markaði með skýrri sýn á vöxt, þróun og fjármagnsskipan. Liður í því sé að gera félagið söludrifnara, efla tengsl við viðskiptavini og vera í fararbroddi við að innleiða nýjungar í tryggingastarfsemi. Samhliða stefnir VÍS á að verða virkur þátttakandi í þróun fjármálastarfsemi á Íslandi með áherslu á arðsaman vöxt, eignastýringu og ýmis önnur tækifæri sem hafa opnast á fjármálamarkaði.
„Á þessum kaflaskilum lætur Helgi Bjarnason af störfum sem forstjóri, en hann hefur leitt starfsemi VÍS frá 1. júlí 2017,“ segir í tilkynningunni og því bætt við það stjórn VÍS muni ráða nýjan forstjóra til félagsins á næstunni og tilkynna um það sérstaklega.
„Það er mat stjórnar VÍS að nú sé rétti tíminn til að gera breytingar á hlutverki forstjóra og hefja nýjan kafla á þeim góða grunni sem lagður hefur verið. VÍS þarf að vera í sífelldu breytingaferli til þess að geta verið skrefinu á undan í þróun trygginga- og fjármálamarkaða á Íslandi. Forstjóraskipti nú eru hluti af því ferli. Markmiðið er að VÍS verði í fararbroddi íslenskra tryggingafélaga, veiti framúrskarandi þjónustu og sé í nánum tengslum við viðskiptavini sína,“ segir jafnframt í tilkynningunni.