Ný kynslóð kaupir Rein

Tvenn hjón, þau Arnar Freyr Magnússon og Íris Blöndahl ásamt Fanneyju Sigurgeirsdóttur og Steinari Þór Ólafssyni, hafa keypt Steinsmiðjuna Rein.

Fyrirtækið, sem hefur verið starfrækt frá árinu 1999, er ein stærsta steinsmiðja landsins og sérhæfir sig í framleiðslu úr náttúrusteini, t.d. sérsmíði á borðplötum fyrir eldhús. Í tilkynningu frá nýjum eigendum kemur fram að þau telji veruleg tækifæri liggja í að styrkja stoðir núverandi reksturs og leita nýrra leiða fyrir lausnir félagsins.

„Við höfum verið á höttunum eftir rótgrónu fyrirtæki sem er að ganga í gegnum ákveðin kynslóðaskipti til að kaupa og taka við keflinu,” segir Arnar Freyr í tilkynningu frá hópnum.