Einblína á orkumál

Viðskiptaráð Íslands mun halda sitt árlega Viðskiptaþing í næstu viku. Einblínt verður á orkumál en í kynningu kemur fram að ýmsar vísbendingar séu um að Íslendingar hafi sofnað á verðinum í orkumálum.

Eftirspurn eftir raforku sé mun meiri en framboðið og því verði fjölmörg góð verkefni ekki að veruleika.

Í kynningu á þinginu kemur fram að leitast verði við að varpa ljósi á tækifæri til orkunýtingar og leiðir til að yfirstíga hindranir með það að markmiði að skapa nauðsynleg verðmæti fyrir samfélagið allt.

Meðal umfjöllunarefna eru tengsl orkuframboðs og lífsgæða, orkuöryggi og byggðamál, nýsköpun og bætt nýting, sem og samkeppnisstaða á orkumarkaði. Aðalræðumaður þingsins er dr. Paul Turner, forstjóri Hecate Wind. Hann mun fjalla um möguleika Íslands á að nýta vindorku á hafi úti.