Valur Hrafn Einarsson er nýr tæknistjóri hjá hugbúnaðarfyrirtækinu Stokki Software. Valur hefur lokið B.Sc gráðu í hugbúnaðarþróun frá Háskólanum í Reykjavík og í tilkynningu frá fyrirtækinu kemur fram að hann hafi víðtæka reynslu úr tæknigeiranum.
Frá árinu 2018 stýrði hann vefþróunardeild Sýnar en meðal verkefna voru þróun á tækniumhverfi fyrir Vísi, sjónvarpsappi Stöðvar 2 og útvarspöppum Sýnar.
„Reynsla Vals mun styrkja Stokk Software í sinni vegferð og hann kemur með verðmæta þekkingu á öllum sviðum starfsemi okkar. Það er mikil eftirspurn á stafrænum lausnum og stafræn þróun fyrirtækja í hámarki svo við erum spennt að fá Val til okkar til að leiða tækniþróun fyrirtækisins áfram,“ er haft eftir Árdísí Björk Jónsdóttur, framkvæmdastjóra Stokks.