Verða alls með 600 flugmenn

Bogi Nils Bogason, forstjóri Icelandair, segir félagið verða með um 600 stöðugildi flugmanna í sumar. Þar af um 550 í millilandaflugi. Alls verði um 4.300 stöðugildi hjá félaginu næsta sumar.

Félagið auglýsir nú eftir flugmönnum en Bogi segir ekki liggja fyrir hversu margir verða ráðnir í þessari lotu. Það sé í skoðun.

Nú starfi álíka margir flugmenn hjá félaginu og fyrir kórónuveirufaraldurinn. Vegna kröftugrar eftirspurnar og stækkunar leiðarkerfisins sé félagið að ráða starfsfólk en janúar hafi verið metmánuður í sölu hjá félaginu.