Viðskipti | mbl | 13.3.2023 | 10:19 | Uppfært 12:34

Rauðar tölur í morgun og titringur vegna falls SVB

Fall SVB í síðustu viku hefur orsakað titring á mörkuðum um allan heim. Hlutabréf á meginlandi Evrópu sem og hér á Íslandi hafa lækkað nokkuð í viðskiptum í dag. AFP/Justin Sullivan

Hlutabréf hafa lækkað nokkuð skarpt bæði hér á landi sem og annars staðar í Evrópu eftir opnun markaða í morgun. Kemur lækkunin til þrátt fyrir tilraunir yfirvalda í Bandaríkjunum að auka aftur traust á fjármálakerfinu í kjölfar falls bandaríska fjárfestingabankans Silicon Valley Bank (SVB) í síðustu viku.

Úrvalsvísitalan hér á landi hefur lækkað um 2,89% það sem af er degi. Mest lækkun er á bréfum Sjóvár, um 4,71% og næst mest á bréfum Skeljar, um 4%, en þó aðeins í eins milljóna viðskiptum.

Frétt af mbl.is

Ríkið ætlar ekki að bjarga Silicon Valley Bank

FTSE 100 vísitalan í Lundúnum hefur lækkað um tæplega 2% á meðan lækkun DAX-vísitölunnar í Þýskalandi er nokkuð meira, eða um 2,4%. CAC 40-vísitalan í Frakklandi hefur lækkað um tæplega 2,3% og á Ítalíu er lækkun FTSE MIIB-vísitölunnar yfir 4%.

Credit Suisse í sögulegu lágmarki

Hlutabréf svissneska bankans Credit Suisse hröpuðu hins vegar í morgun og lækkuðu um tæplega 9% og eru nú í sögulegu lágmarki. Stóð gengi bréfa bankans fyrr í morgun í 2,275 frönkum á hlut, en með því hafa bréf bankans lækkað um 81% síðan í mars árið 2021, þegar breska fjármálafyrirtækið Greensil fór á hausinn. Var það fyrsti skandallinn af mörgum sem komu illa við svissneska bankann á síðustu misserum.

Aðrir evrópskir bankar hafa einnig lækkað nokkuð í dag, en þýski bankinn Deutsche bank lækkaði um 6,7% í morgun og Commerzbank, næst stærsti banki Þýskalands lækkaði um tæplega 12%. Þýska fjármálaeftirlitið sendi í morgun frá sér tilkynningu þar sem tekið var fram að fall SVB væri ekki ógn fyrir fjárhagslegan stöðugleika í Þýskalandi þrátt fyrir titring á mörkuðum. Bent var á að eignir þýska útibús SVB hefðu aðeins verið um 790 milljónir evra um síðustu áramót.