Veltan í iðnaði hefur tvöfaldast
Veltan í iðnaði hér á landi hefur tvöfaldast frá árinu 2014 en hún nam 1.962 milljörðum króna á á árinu 2022 sem nemur 31% af heildarveltu hagkerfisins.
Aukningin skýrist af auknum umsvifum í greininni og verðbreytingum, að því er fram kemur í nýrri greiningu Samtaka iðnaðarins um umfang og vaxtartækifæri í iðnaði hér á landi.
Þar kemur fram að verði áform innan greinarinnar um verulega aukningu í útflutningi að veruleika gæti hagvöxtur orðið töluvert meiri á næstu árum en reiknað er með í hagvaxtaspám.
Iðnaður hefur staðið undir 30% af allri fjölgun launþega í hagkerfinu á síðustu tíu árum og er greinin sú stærsta í útflutningi hagkerfisins.
Hugverkaiðnaður í miklum vexti
Hugverkaiðnaður skilaði tæplega fimmfalt meira í útflutningstekjur í fyrra en árið 2008.
Vægi greinarinnar í útflutningi var 14% á síðasta ári og voru útflutningstekjur 239 milljarðar króna.
Samkvæmt könnun SI meðal nokkurra fyrirtækja í hugverkaiðnaði munu útflutningstekjur greinarinnar þrefaldast fram til ársins 2027 og verða þá 700 milljarðar.
Útflutningstekjur hagkerfisins í heild munu aukast um nær fjórðung við þetta, að sögn SI.
