Marel greiðir 1,75 milljarða í arð

Aðalfundur Marel fór fram í gær og voru allar tillögur stjórnar til fundarins samþykktar. Þar á meðal var samþykkt að greiða út arð að fjárhæð 1,56 evrusent á hvern hlut fyrir rekstrarárið 2022.

Heildargreiðsla nemur um 11,7 milljónum evra, sem nemur rúmlega 1,75 milljörðum króna, eða um tuttugu prósentum af hagnaði fyrirtækisins á liðnu ári.

Þetta kemur fram í tilkynningu frá Marel.

Frétt af mbl.is

Metfjórðungur tekna hjá Marel

Stjórnarmeðlimir endurkjörnir

Stjórnarformaður félagsins, Arnar Þór Másson, ávarpaði fundinn fyrir hönd stjórnar og Árni Oddur Þórðarson, forstjóri, gaf skýrslu um fjárhagsárið 2022 og veitti innsýn í starfsemi félagsins. 

Á fundinum voru þau Ann Elizabeth Savage, Arnar Þór Másson, Ástvaldur Jóhannsson, Lillie Li Valeur, Ólafur Steinn Guðmundsson, Svafa Grönfeldt og Ton van der Laan öll endurkjörin í stjórn Marel.

Samþykktu kaupauka í formi hlutabréfa

Að auki var tillaga um stefnu félagsins um kaupauka í formi frammistöðutengdra hlutabréfa  samþykkt. Hluthafar samþykktu einnig tillögu um stjórnarlaun vegna ársins 2023 og þóknun til endurskoðenda fyrir liðið starfsár. 

Jafnframt var samþykkt tillaga um endurnýjun á grein í samþykktum félagsins sem heimilar stjórninni að hækka hlutafé um allt að 75 milljónir króna að nafnvirði með útgáfu nýrra hluta til að nota í tengslum við fyrirtækjakaup félagsins eða stefnumarkandi fjárfestingar.

Endurskoðunarskrifstofan KPMG ehf. var kosin endurskoðandi félagsins. 

Markmið um EBIT helst óbreytt

„Frá skráningu á hlutabréfamarkað árið 1992 hefur Marel þróast frá því að vera sprotafyrirtæki með 45 starfsmenn og 6 milljónir evra í árstekjur yfir í leiðandi alþjóðlegt fyrirtæki á sviði lausna, hugbúnaðar og þjónustu í matvælavinnslu með um 8.000 starfsmenn og 1,7 milljarð evra í tekjur,“ kemur fram í skýrslu stjórnarformanns Marel, Arnars Þórs Mássonar.

„Á árinu 2023 munu áherslur félagsins einkum felast í enn nánara samstarfi við viðskiptavini okkar samhliða aukinni skilvirkni og hraða á grundvelli innviðafjárfestinga. Markmið okkar um 14-16% EBIT í lok ársins helst óbreytt. Vert er að minna á að tekjur og pantanir geta sveiflast á milli ársfjórðunga.

Við höldum áfram að fjárfesta í innviðum og sjálfvirknivæðingu til að styðja við metnaðarfull markmið okkar um að 50% af tekjum félagsins komi frá þjónustu og hugbúnaði árið 2026,“ kemur fram í skýrslu Árna Odds Þórðarsonar, forstjóra Marel.

• Blogga um frétt