Hjálmar Helgi tekur við nýju sviði hjá ON
Hjálmar Helgi Rögnvaldsson mun taka við nýju sviði viðskiptaþróunar og orkumiðlunar hjá Orku náttúrunnar. Hjálmar, sem hefur starfað hjá ON í níu ár, kemur inn í framkvæmdastjórn félagsins.
Sviðið mun sinna orkumiðlun, orkukaupum, samningum við stórnotendur, öflun nýrra viðskiptatækifæra á stórnotendamarkaði, uppbyggingu Jarðhitagarðs ON og hinum ýmsu greiningum á raforkumarkaði, að því er fram kemur í tilkynningu félagsins.
„Þetta brýnir okkur enn frekar í þeirri vegferð sem við höfum verið á enda mikið af tækifærum sem þarna felast. Eitt þeirra felst í uppbyggingu Jarðhitagarðs ON. Um þessar mundir standa yfir miklar framkvæmdir hjá Climeworks í garðinum en auk þess er metnaðarfull vinna við framtíðarstefnumótun garðsins í fullum gangi. Það eru því vissulega spennandi tímar framundan hjá Orku náttúrunnar,“ er haft eftir Hjálmari Helga í tilkynningunni.
Þar segir einnig að auk þessara breytinga hafi í vikunni verið auglýst í starf markaðsstjóra ON.
„Þetta endurspeglar þær áherslubreytingar sem eru að verða hjá fyrirtækinu þar sem við viljum einblína meira á vörumerkið okkar og þau verkefni sem heyra undir hið nýja svið
Viðskiptaþróunar og orkumiðlunar. Ég er sannfærður um að breytingarnar munu hjálpa okkur enn frekar í að vaxa og halda betur fókus í þeim krefjandi verkefnum sem framundan eru,“ er haft eftir Árna Hrannari Haraldssyni framkvæmdastjóri Orku náttúrunnar.
