80 milljarðar í reiðufé í umferð
Setja bókamerki
Samtals eru nú tæplega 80 milljarðar króna í reiðufé í umferð hér á landi, en sú upphæð hefur lækkað síðustu ár. Erfiðara aðgengi að reiðufé með fækkun hraðbanka og útibúa er einnig áhyggjuefni og gæti orsakað vandamál ef upp koma rekstrarerfiðleikar með rafræna greiðslumiðlun.
Þetta var meðal þess sem kom fram í máli Hauks C. Benediktssonar, framkvæmdastjóra fjármálastöðugleika Seðlabankans, á kynningarfundi bankans í morgun.
Haukur fór þar yfir að reiðufé í umferð hafi dregist lítillega saman síðustu ár þegar horft er til nafnvirðis. Þegar upphæðin er sett í samhengi við landsframleiðslu hefur hlutfall reiðufjár í umferð lækkað umtalsvert og er nú um 2,1% og er lágt í alþjóðlegum samanburði að sögn Hauks, en á sama tíma heldur kortanotkun áfram að aukast.
Segir hann að með hagræðingaraðgerðum sínum, sem feli meðal annars í sér fækkun útibúa og hraðbanka, hafi viðskiptabankarnir gert almenningi erfiðara fyrir að nálgast reiðufé. „Þessi þróun er nokkuð áhyggjuefni þar sem hún getur grafið undan þeim möguleika að nota reiðufé sem varalausn ef upp kemur þjónusturof í rafrænni greiðslumiðlun,“ sagði Haukur.
Nefndi Haukur mikilvægi þess að halda uppi greiðslukerfum og að aukið samstarf væri nauðsynlegt bæði til að fyrirbyggja netárásir á fjármálainnviði og til að bregðast við ef árásir valdi skaða.
Í dag eru útibú tæplega 2 á hverja þúsund íbúa og hefur þeim fækkað umtalsvert síðasta áratuginn. Þá eru rhaðbankar nú rúmlega fimm á hverja þúsund íbúa.
