Ójöfnuður í minna lagi á Íslandi

Ójöfnuður á Íslandi er tiltölulega lítill í evrópskum samanburði ef marka má niðurstöður lífskjararannsóknar Hagstofu Íslands.

Ójöfnuður er mældur með svokölluðum Gini-stuðli sem er á bilinu 0 og upp í 100 þar sem stuðullinn er 0 ef allir hefðu jafnar tekjur og 100 ef einn maður hefði þær allar.

Gini-stuðullinn hér á landi á síðasta ári var 24,2 en meðaltalið í ríkjum Evrópusambandsins var 29,6. Stuðullinn var hæstur í Búlgaríu eða 38,4 og lægstur í Slóvakíu eða 21,2.

Tekjuhæstu heimilin með yfir þrisvar sinnum meira á milli handanna

Þá höfðu 20% tekjuhæstu heimilin 3,5 sinnum hærri ráðstöfunartekjur en 20% tekjulægstu heimilin en tekjumunur á milli hópanna tveggja er meiri þegar ekki er tekið tillit til félagslegrar aðstoðar. Svokallaður fimmtungsstuðull mælir tekjumun milli efsta og neðsta tekjufimmtungs.

Bæði Gini-stuðullinn og fimmtungsstuðullinn hafa tekið litlum breytingum frá árinu 2018. Lægstur var Gini-stuðullinn árið 2018 eða 24,2 en hæstur árið 2020 eða 24,8. Fimmtungsstuðullinn var lægstur árið 2018 eða eða 3,3, en hæstur árið 2020 eða 3,6.

• Blogga um frétt