Besta sætanýting í sögu Play

Flugfélagið Play flutti 187.960 farþega í ágúst síðastliðnum, sem er 1,8% aukning frá sama mánuði í fyrra þegar félagið flutti 184.926 farþega.

Sætanýtingin í nýliðnum ágústmánuði var 91,6%, sem er met í einum mánuði hjá Play. Þetta er 2,7% aukning frá ágúst í fyrra þegar sætanýtingin var 88,9%.

Play flaug til 32 áfangastaða í ágúst en af þeim voru 22 með yfir 90% sætanýtingu. Á sama tíma og félagið náði metsætanýtingu var stundvísi félagsins 91,5%, sem er umtalsvert hærra en hjá helstu samkeppnisaðilum félagsins, að því er kemur fram í tilkynningu. Play hefur nú verið stundvísasta félagið sem flýgur frá Keflavíkurflugvelli 13 mánuði í röð.

18,4% vöxtur

Af þeim farþegum sem flugu með Play í ágúst voru 25,9% á leið frá Íslandi, 35,6% voru á leið til Íslands og 38,5% voru tengifarþegar (VIA). 48.694 farþegar flugu með félaginu frá Íslandi í ágúst 2024, samanborið við 41.112 farþega í ágúst 2023, sem er 18,4% vöxtur á milli ára.

Flugfélagið hóf miðasölu til tveggja áfangastaða í ágústmánuði, annars vegar Faro í Portúgal og hins vegar Álaborgar í Danmörku. Þar að auki hefur flugfélagið tilkynnt að það muni fjölga ferðum til Vilníus á næsta ári, úr einni ferð í viku upp í tvær.

Þá var tilkynnt nýlega að Play sé það flugfélag sem Íslendingar telji að hafi jákvæðustu áhrifin á íslenskt samfélag með rekstri sínum. Þessi viðurkenning er niðurstaða rannsóknar sem fyrirtækið Prósent gerði með því að leggja spurningar fyrir úrtakshóp sem taldi 15.000 manns. Play fékk þar afbragðseinkunn upp á 73 og var á toppnum yfir íslensk flugfélög og í sjöunda sæti yfir öll fyrirtæki á landinu.

Stolt af sætanýtingunni

„Við erum svakalega stolt af þessari metsætanýtingu í ágúst. Þetta sýnir að það er tekið vel í þá þjónustu sem við bjóðum upp á þeim mörkuðum sem við störfum og að eftirspurnin hefur tekið við sér. Þetta afrek er sérstaklega eftirtektarvert því við náum því í ágústmánuði sem getur reynst snúinn í sölu því flestir eru aftur komnir í rútínu eftir sumarfrí. Þrátt fyrir það náðum við að fá fleiri í flugvélarnar okkar og auka þar með sætanýtinguna,“ segir Einar Örn Ólafsson, forstjóri Play, í tilkynningunni.

Einar Örn Ólafsson, forstjóri Play. Ljósmynd/Bernhard Kristinn

„Við erum einnig ánægð að sjá að farþegum sem fljúga til landsins fjölgar á milli ára og að talsverð aukning er á farþegum sem fljúga með okkur frá Íslandi. Þetta er staðfesting á því að íslenski markaðurinn er ánægður með okkar þjónustu og að ákvörðun okkar um að bjóða upp á frábært úrval af sólarlandaáfangastöðum er að borga sig.

Ofan á allt þetta var stundvísi okkar í ágústmánuði 91,5 prósent, sem er stórbrotið afrek hjá samstarfsfólki mínu. Þetta þýðir að þrettánda mánuðinn í röð er Play stundvísasta flugfélagið, með mikil umsvif, sem flýgur frá Keflavíkurflugvelli. Þegar litið er til næstu mánaða er bókunarstaðan okkar betri en á sama tíma í fyrra og ég get ekki annað en verið fullur eftirvæntingar fyrir komandi tímum,“ bætir hann við.

• Blogga um frétt