Viðskipti | mbl | 10.9.2024 | 9:31 | Uppfært 11:17

FKA-konur fóru heim með rauða sokka

Félag kvenna í atvinnulífinu kynnti með stolti þátttöku Höllu Tómasdóttur, forseta Íslands, og Dr. Eddu Sifjar Pind Aradóttur, framkvæmdastjóra Carbfix, á glæsilegum viðburði. Ljósmynd/Silla Páls

Félag kvenna í atvinnulífinu (FKA) hélt opnunarviðburð sinn á dögunum hjá Carbfix við Hellisheiðarvirkjun en félagið fagnar 25 ára afmæli á árinu. Félagið segir þann kraft sem býr í íslenskum konum hafa verið alltumlykjandi á viðburðinum en þar sameinuðu meðal annars þær Halla Tómasdóttir, forseti Íslands, og Dr. Edda Sif Pind Aradóttir, framkvæmdastjóri Carbfix, krafta sína.

Á viðburðinum gafst konum einstakt tækifæri til að skoða eitt af holutopphúsum Carbfix, þar sem koldíoxíð er breytt í stein en húsið hefur prýtt forsíðu National Geographic. Konur komu alls staðar að af landinu til að hefja starfsárið saman.

Andrea Róbertsdóttir, framkvæmdastjóri FKA, ásamt Unni Elvu, Eddu Aradóttur, Höllu Tómasdóttur forseta og Silju Y Eyþórsdóttur frá Carbfix. Ljósmynd/Silla Páls

Í tilkynningu frá FKA í tengslum við viðburðinn kemur fram að Edda Sif hafi hlotið fjölda innlendra og alþjóðlegra viðurkenninga fyrir leiðandi starf sitt. Hún hafi hlotið hvatningarviðurkenningu FKA 2022 auk þess sem Time-tímaritið hafi valið hana eina af áhrifamestu manneskjum í heiminum á sviði loftslagsmála.

Þá hafi þær Edda og Halla forseti báðar verið á lista Reuters yfir 20 brautryðjandi konur á sviði loftslagsmála á alþjóðlegum baráttudegi kvenna.

Dr. Edda Sif Pind Aradóttir, framkvæmdastjóri Carbfix, Unnur Elva Arnardóttir, formaður FKA, og Halla Tómasdóttir, forseti Íslands. Ljósmynd/Silla Páls

Ísland ætti að vera land lausna

Fram kemur að á viðburðinum hafi konur eflt tengslin og hlýtt á pallborðsumræður Höllu og Eddu Sifjar, þar sem farið var um víðan völl en jafnrétti, hugrekki og loftslagsaðgerðir verið meginstefið, sem og að Ísland ætti að vera land lausna.

„Við stöndum á öxlum fjölmargra kvenna og annarra sem hafa rutt brautir og bætt heiminn, hvort sem það hefur verið í hænuskrefum eða stórum stökkum. Halla Tómasdóttir og Edda Sif eru sannarlega í þeim hópi. Til að minna konur á að það er ekkert gefið í þessum málum voru allar sendar heim með rauða sokka frá Icewear, með vísun í Rauðsokkur sem hafa heldur betur haft áhrif á líf okkar og skrifað konur inn í söguna. Barátta Rauðsokkanna hefur gert heiminn betri, þær ruddu brautina fyrir komandi kynlóðir - fyrir okkur,“ segir að lokum í tilkynningunni.