„Klingjum því klukkum í nafni baráttunnar“

Bjöllum Nasdaq kauphalla hefur víða verið hringt þessa vikuna og þar á meðal á Íslandi í tilefni af Alþjóðlegri fjárfestaviku 7. – 11. Október. Aðeins 11% ungmenna segjast hafa fengið fjármálafræðslu í grunnskóla samkvæmt nýlegri könnun Gallup.

Þetta kemur fram í tilkynningu frá Kauphöllinni.

Markmiðið með fjárfestavikunni er að vekja athygli á mikilvægi fjárfestaverndar og fræðslu fyrir almenning um fjárfestingar og sparnað.

Ungmenni sem unnu Fjármálaleika Samtaka fyrirtækja í fjármálaþjónustu (SFF) aðstoðuðu Nasdaq Iceland og SFF við hringinguna á Kauphallarbjöllunni í ár.

Verðbréfamarkaðurinn gegnir stóru hlutverki

Í kjölfarið tóku ungmennin þátt í Evrópukeppni í fjármálalæsi í Brussel á vegum Evrópsku bankasamtakanna (EBF).

„Góður skilningur á fjármálum getur hjálpað fólki að ná betri tökum á eigin fjárhag og taka upplýstar ákvarðanir um og sparnað,“ er haft eftir Magnúsi Harðarsyni, forstjóra Nasdaq Iceland, í tilkynningunni.

„Verðbréfamarkaðurinn gegnir stóru hlutverki í þessum efnum sem vettvangur sem hefur beint og óbeint áhrif á fjárhag okkar. Aukin þekking á honum leiðir til ígrundaðri fjárfestinga og styrkir atvinnu- og efnahagslífið.”

Magnús Harðarson forstjóri Nasdaq Iceland, Heiðrún Jónsdóttir, framkvstjóri SFF, Marinó Máni Harðarson, Dagur Thors, Soffía Hrönn Hafstein, Kristján Oddur Kristjánsson, Þórey S. Þórðardóttir, framkv.stjóri Landssamtaka lífeyrissjóða Ljósmynd/Aðsend

11% ungmenna fengu fjármálafræðslu í grunnskóla

Haft er eftir Heiðrúnu Jónsdóttur, framkvæmdastjóra SFF, að nýleg könnun Gallup sýni að aðeins 11% af ungmennum hefðu fengið fjármálafræðslu í grunnskóla.

„Það er afar mikilvægt að öllum börnum sé gefinn kostur á að byggja upp heilbrigðan fjárhag. Því höfum við talað fyrir því að kennsla í fjármálum verði hluti af skyldunámi í grunnskólum. Bakland barna eða skólahverfi eiga ekki að ráða hér úrslitum. Öll börn verða að hafa tækifæri til að læra um fjármál,“ er haft eftir Heiðrúnu í tilkynningunni.

SFF hefur síðustu 10 ár haldið úti fræðsluvettvanginum Fjármálaviti með stuðningi Landssamtaka lífeyrissjóða.

Ljósmynd/Aðsend

Gefið 18 þúsund bækur

Er þeim vettvangi ætlað að stuðla að bættu fjármálalæsi ungmenna og styðja kennara í grunn- og framhaldsskólum í kennslu um fjármál, meðal annars með fríu námsefni og öðrum viðburðum tengdum fjármálalæsi.

Fram kemur að á síðustu 10 árum hafi Fjármálavit gefið kennurum og nemendum um 18.000 bækur.

„Ungt fólk kallar eftir fræðslu og þekkingu um fjármál. Við skynjum skýrt að upplýsingamiðlun í þeim efnum er þarft og þakklátt verkefni sem við styðjum í verki. Klingjum því klukkum í nafni baráttunnar fyrir því að fjármálafræðsla og fjármálalæsi verði sjálfsögð námskrárefni í grunnskólakerfinu,“ er haft eftir Þóreyju S. Þórðardóttur, framkvæmdastjóra Landssamtaka lífeyrissjóða.

• Blogga um frétt