Genís breytir um kúrs: Þremur sagt upp

Siglfirska líftæknifyrirtækið Genís hefur sagt upp þremur starfsmönnum í rannsóknar og þróunardeild fyrirtækisins. Fimmtán manns hafa starfað hjá fyrirtækinu. Að sögn Róberts Guðfinnssonar, fjárfestis og eins eiganda fyrirtækisins er um áherslubreytingu innan fyrirtækisins að ræða. 

Fyr­ir­tækið hef­ur um tveggja ára­tuga skeið unnið að rann­sókn­um og þróun á líf­virk­um kítín­fá­sykr­um til notk­un­ar í fæðubót­ar­efn­um, lyfj­um og við beinígræðslu.

„Við ætlum að útvista verkefnum þeirra til erlendra háskóla í viðleitni okkar til að hraða þekkingu í fyrirtækinu,“ segir Róbert. 

Hafa starfað við lyfjaþróun 

Rannsóknar- og þróunardeild fyrirtækisins hefur starfað í Reykjavík og að sögn Róberts hafa  starfsmennirnir sem hefur verið sagt upp starfað við lyfjaþróun.

„Við stefnum að því að því að efla framleiðsluhluta starfseminnar fyrir norðan. Á mannamáli þýðir þetta það að þróunin er komin á þann stað að við þurfum að afla okkur enn öflugri þekkingar erlendis. Við erum með rannsóknarstofnanir og háskóla erlendis í sigtinu fyrir þennan hluta starfseminnar,“ segir Róbert. 

Róbert Guðfinnsson, fjárfestir og eigandi Genís. mbl.is/Árni Sæberg

Fingraför nýs forstjóra 

Að sögn hans er þetta ákvörðun nýs forstjóra fyrirtækisins, Sesselju Ómarsdóttur, en tilkynnt var um að hún tæki við sem forstjóri í desember á síðasta ári.

Frétt af mbl.is

Sesselja Ómarsdóttir ráðin forstjóri Genís

„Hún er að setja sín fingraför á þetta. Við erum að einbeita okkur meira að svokölluðu beingræði þannig við erum að færa til innan félagsins,“ segir Róbert. 

• Blogga um frétt