Kínverjar vængstýfa Boeing

Kínversk stjórnvöld hafa fyrirskipað flugfélögum landsins að stöðva móttöku á farþegaþotum frá bandaríska flugvélaframleiðandanum Boeing. Þetta kemur fram í frétt Bloomberg og er bent á að þetta séu enn ein viðbrögð Kínverja við ákvörðun Bandaríkjastjórnar um að leggja allt að 145% toll á kínverskan innflutning.

Samkvæmt fréttinni hafa stjórnvöld í Peking jafnframt lagt bann við kaupum kínverskra flugfélaga á flugvélaíhlutum og tengdum búnaði frá bandarískum fyrirtækjum. Þessi aðgerð gæti haft víðtæk áhrif, þar sem stærstu flugfélög Kína – Air China, China Eastern og China Southern – höfðu áform um að taka við samtals 179 Boeing-vélum á tímabilinu 2025 til 2027.