Óvarlegt að refsa með verri kjörum

Hann segir að það yrði mjög óvarlegt af t.d. Landsbankanum að refsa viðskiptavini sínum með verri kjörum ef hann kysi að vera áfram hjá Sjóvá.

10 ára afmæli

Sjóvá er í íslensku kauphöllinni og hélt upp á tíu ára skráningarafmæli á síðasta ári. „Við fórum á markað árið 2014. Það er gaman að segja frá því að 70% af stærstu eigendum félagsins á þeim tíma eru enn í eigendahópnum. Það hefur sem sagt orðið mjög lítil breyting á stærstu eigendum og fjöldi hluthafa hefur einnig haldist svipaður. Velta með bréfin er minni en í mörgum öðrum félögum. Það á sér þær skýringar að fólk hefur haft trú á félaginu og vegferð þess. Fólk heldur í bréfin fremur en að selja þau,“ segir Hermann, en Sjóvá er skilgreint sem arðgreiðslufélag.

Arðgreiðslustefna félagsins miðar við að greiða að lágmarki 50% af hagnaði hvers árs til hluthafa í formi arðs að teknu tilliti til gjaldþols.

„Við lögðum upp með tvennt á sínum tíma: að skila góðu búi í okkar grunnrekstri, vátryggingarrekstrinum. Það er það sem við höfum mest áhrif á og erum ráðin til að gera. Hinn parturinn er að sinna fjárfestingarhlutanum vel. Hann er meira háður markaðsforsendum, sem við höfum á margan hátt minni stjórn á.“

Græða á tá og fingri

Eins og Hermann rifjar upp var einbeiting á árum áður hjá bönkum og tryggingafélögum ekkert rosalega mikil á grunnstarfsemina, viðskiptabankastarfsemi og tryggingstarfsemi. „Fyrirtækin voru að græða á tá og fingri annars staðar – í fjárfestingum. Þetta er vanvirðing við grunnreksturinn. Það þarf alltaf að hlúa að honum og tryggja að hann sé arðbær.“

Hann segir að frá því að Sjóvá fór á markað hafi félagið alltaf skilað hagnaði af vátryggingarstarfseminni, sem sé mjög mikilvæg staðreynd. „Við höfum staðið við það loforð að næra grunnreksturinn og sinna honum eins og kostur er.“

Um það að vera arðgreiðslufélag segir Hermann að mörg félög segist vilja vera vaxtarfélög. Að stækka og auka þannig verðgildi fyrirtækisins. „Við vorum ekki að sækja fé við skráningu á markað heldur gefa almenningi og öðrum færi á að eignast hluti í félaginu. Uppleggið var strax að vera arðgreiðslufélag, stöðugt rekstrarfélag sem skilar þá ásættanlegri ávöxtun við kaup á bréfum. Því höfum við náð.“

En væri ekki félagið meira spennandi í augum fjárfesta ef það væri að leita að ytri vexti?

„Við erum iðulega spurð að þessu,“ segir Hermann. „Hvort einhver vaxtaráform séu hjá okkur innanlands eða erlendis. Við svörum og segjumst vera vakandi fyrir því og þó að við sameinumst ekki banka þá erum við þátttakendur á markaðnum en þurfum að vega og meta hvað er skynsamlegt og gæti fallið vel að starfsemi okkar.“

Hermann segir að félagið hafi vaxið með viðskiptavinum sem eru í greinum sem hafi stækkað mikið á síðustu árum, eins og ferðaiðnaðinum.

Úr 21 í 49 milljarða

Markaðsvirði Sjóvár var um 21 milljarður króna við skráningu en er nú í kringum 49 milljarðar.

„Á þessum tíma höfum við greitt til hluthafa ýmist í formi arðgreiðslna, endurkaupa eigin hlutabréfa eða með niðurfærslu hlutafjár, um 30 milljarða króna. Á sama tíma höfum við vaxið um sex prósentustig í markaðshlutdeild.“

Hann segir að velta megi fyrir sér hvort vöxturinn sé á kostnað neytenda. „Svarið við því er nei,“ segir Hermann.

„Við værum ekki að vaxa nema við hefðum eitthvað fram að færa. Það sem við leggjum til er mjög góð þekking á okkar starfsemi og mikil nánd við viðskiptavini. Við leggjum okkur fram um að vera í frumkvæðissamskiptum við viðskiptavinina þannig að arðsemin hefur haldist í hendur við þessar áherslur. Við höfum vaxið á þeim forsendum að vera þjónustufyrirtæki í fremstu röð.“