Bretar svartsýnir á efnahagshorfur

Ný könnun breska markaðsrannsóknafyrirtækisins Ipsos MORI hefur leitt í ljós að almenningur í Bretlandi hefur ekki verið svartsýnni um efnahagshorfur í landinu í marga áratugi.

Um það bil 75% svarenda sögðust búast við að efnahagsástandið færi versnandi á næstu tólf mánuðum og er það aukning um átta prósentustig á milli mánaða. Aðeins 7% svarenda búast við að efnahagur Bretlands fari batnandi og 13% þeirra reikna með óbreyttu ástandi. Meðaltal könnunarinnar er reiknað með því að draga hlutfall svartsýnna frá hlutfalli bjartsýnna og fæst þá talan -68, en það er lægsta gildi sem sést hefur frá því mælingar Ipsos MORI hófust árið 1978. Á því tímabili fengu Bretar m.a. að takast á við efnahagskreppuna árið 1980, fjármálakreppuna árið 2008 og efnahagslegar afleiðingar kórónuveirufaraldursins, en í öll þrjú skiptin var -64 lægsta gildið sem mældist.